Buhfai man tihsan vangin thla khatah Sorkarin cheng nuai 59.62 a hum

Mizoram sorkarin January 1, 2015 aṭanga Above Poverty Line (APL)-te tana buhfai man Rs. 15-a a tihsan avangin sorkarin thla khatah Rs. 59,62,550 leh kum khatah Rs. 7,15,50,600 a hum thei dawn.

RTI Act hmanga zawhna, Food Civil Supplies & Con­sumers Affairs department SPIO-in a chhan danin, APL-te tana buhfai man rate hlui, Rs. 9.50 aṭanga Rs. 15-a tihsan hi Mizoram sorkara Cabinet Mee­ting thu anga tih a ni a; buhfai man tihsanna tur thupek chu December 23, 2014-ah FCS&CA director R Lalvena'n a chhuah.
Mizoramah APL chhungkua 2,11,663 an awm mek a, APL-te tan hian thla khatah buhfai kg. 10,84,100 mamawh a ni. Kumin aṭanga buhfai punna hi Rs. 5.50 a ni a, rate hmasa aia tuna a rate-a buhfai mana sum hmuh belh chu thla khatah Rs. 5,962,550 a ni.
Hetih lai hian, APL chhung­kua hi ration card pek chhuah thar leh paih an awm reng avangin a danglam fo a, APL chhungkaw tehfungah Mizoram sorkarin a hmang lo. Sorkar laipuia Ministry of Food and Public Distribution-in a thliar angin, BPL leh APL chhungkuain a huam loh zawngte chu AAY-ah an awm.
Buhfai man tihsan chung­changah, Central aṭanga tihsan­na order copy pawh RTI Act hmanga dil tel a ni a; Food Cor­po­ration of India-a Budget & Cost Division-a general manager RK Maindiratta chuan, January 14, 2015-ah buhfai man tihsanna circular hnuhnung ber a tichhuak a ni.
FCI-in buhfai rate a tih­chhuah thar berah chuan, common rice chu quintal khat Rs. 3,062, grade-A Rs. 3,134, leh rice (weighted average) chu Rs. 3,112 a ni.
APL-te tana buhfai man tihsan chungchanga zawhna SPIO-in a chhan danin, sorkar laipui/Food Corporation of India chuan Targetted Public Distribution System (TDPS) hnuaia essential commodity sem ṭhin leh state sorkarin an leina tur rate an bithliah ṭhin a; Mizoram sorkarin a bithliah theih chu mipuiin retailer aṭanga an leina man a ni.
Cabinet meeting thutlukna anga January 1, 2015-a APL-te buhfai man tihsan chhan an tarlan chu - thil hrang hrang man san tawh vang leh Central-in FCI aṭanga buhfai a hralhna rate (Mizoram sorkarin a leina rate) a tihsan zel vang a ni.
Mizoram sorkarin APL-te tana buhfai man tlâwm, kg. khatah Rs. 8.30-a a hmuh theih zat chu thla khatah quintal 28,410 a ni a, hei hi Mizoram mipuiin an kham loh avangin thla tin economic cost-in qtl. 80,000-in lei a ni ṭhin a; 2014 tawp lam khan economic cost aia tlawmin private aṭangin a lei belh.
APL buhfai man pung mah se, AAY chhungkaw tan kg. khatah Rs. 3 leh BPL tan Rs. 6.15-a la pek chhuah reng a ni.