Census neih tumah Chakma-te NHRM leh MHA-ah an zualko

Central YMA-in Chakma chhiarpui neih a tum chungchangah Chak­ma pawl hrang hrangte chu National Human Rights Com­mission (NHRM) leh Minis­try of Home Affairs (MHA)-ah an zualko.

Chakma pawl hrang hrangte hian NHRM leh MHA hnenah hian chhiarpui neih an duh lohna chhan hrang hrang an tarlang a; Chakma-te an zualko avang hian NHRM leh MHA-te chuan Mizoram sorkar chu insawifiah tur­in a hriattir a ni. Home de­partment hotute chuan in­sawifiahna tur hi an buai­pui mek tih Vanglaini palai zawhna chhangin an sawi.

Home department aṭanga thu dawn danin, Chakma chhiarpui neihna tura YMA-in form an duanah chuan, YMA counter signed a ngaih dawn avangin sorkarin a pawm lo a, form dang duan a ni. Chhiarpui neih ringawtin Chakma foreigner dapchhuah kawngah awmzia a nei dawn loa hriat a nih avangin Mizoram sorkar chuan YMA chu kawng dang zawnpuiah an sâwm mek a ni.

Hetih lai hian, ni­mina YMA kumpuan hawnnaah Central YMA general secretary chuan, Chakma chhiarpui neihna atana Central YMA-in pawisa a dawn tawh zat chu Rs. 3,86,257 a nih thu a sawi a, "Chakma chhiarpui neih tum hi kan la kalpui reng a ni," a ti a, census form buai­pui mek a nih thu a sawi.