Lawngtlai bandh titawp lailâwk

Central Young Lai Association (CYLA)-in Lai Autonomous District Council (CADC) huam chhunga February 24 aṭanga total bandh an huaihawt chu February Inrinni zing dar 1 aṭangin an titâwp lailâwk.

Thu dawn danin, CYLA Central Executive Committee member-te February 27, 2015-a ṭhukhawm chuan bandh tihtawp lailawk an rel a; an thil phûtah March 3, 2015 thleng sorkar an ngaichâng ang a, sorkar aṭanga thu lawmawm an hmuh loh chuan March 4 zing dar 6 aṭangin bandh an chhunzawm leh dawn a ni.

CYLA hruaitute chuan, Lawngtlaia P&E division dah an phut chungchangah hmasawnna thui tak a awm tawh tih sawiin, "P&E division dah chungchanga sorkar file kal mekin chief minister dawhkan a thleng tawh niin kan hria a, CM thuchhuak beiseina sang tak nen kan thlir mek a ni," a ti.