Vawiinah zirlaite'n kawng an zawh dawn Scholarship pek kim vek an ni ang: CM

Scholarship atana Mizoram sorkarin a tum ve tur a pek chhuah loh avangin Mizo Students Union (MSU) chuan vawiin hian 'Zirlaite chanvo rahbeh duh lohna' tih hming vuahin Aizawlah kawng an zawh dawn. Hetihlai hian chief minister Lal Thanhawla chuan budget tharah scho hi a kima pek an nih tur thu a sawi.

MSU tarlan danin, kawngzawh hi chawhma dar 10:30-ah ṭan tur a ni a, Sikulpuikawn leh Chanmari kâwn aṭanga zawh ṭanin, Vanapa Hall an pan khawm ang. Vanapa Hall kawtah inkhawm tawi an nei zui dawn a ni.

MSU-in kawngzawh an huaihawt chhan chu - academic session 2013-14 atan pre-matric minority scholarship sem tawhah Central sorkarin 75% a tum chiah pek a ni a, Mizoram sorkar tum ve tur 25% tun thlenga pek a la nih loh vang leh, kum 2014-15 atana post-matric tribal scholarship atana Mizoram sorkarin a tum ve tur 10% tun thlenga a la pek chhuah loh vangte a ni.

MSU chuan, pre-matric minority scholarship atana Mizoram sorkarin 25% a tum ve tur hi cheng nuai 700 chuang a nih thu an sawi a, "Zirlaite hian Mizoram sorkara kan chanvo dik tak kan hmuh ngei kan phût a, kan chanvo aia sang kan beisei lo," an ti.

Aizawl City College Joint Students' Union (ACCJSU) pawhin Inrinnia Vanapa Hall-a General Conference an hmanah resolution pass in, kum 2014-15 atana post-matric tribal scholarship-a Mizoram sorkarin 10% a tum ve tur chu a rang lama pek chhuah an phût thu an tarlang.

Inrinnia Aizawl City College Joint Students’ Union-in General Conference an hmannaah Chief Minister chuan zirlaite chu puitling tura inzir an nih thu a sawi a, "Scholarship vanga lehkha zir in ni lo. Puitling tur leh ei leh bara intodelh tura zir in ni. Inhlawhfa chunga lehkha zir hrâm hrâmte hi mi zahawm an ni," a ti.

Zirlaite thil phût chungchangah hian CM Lal Thanhawla chuan, scholarship atana sorkar tum tur 10% chu pek chhuah mai theih a ni lo a, budget thara pass a nih hunah pek chhuah a nih tur thu a sawi.