KṬP-te'n ram tan chaw ngheia ṭawngṭai an rel

KṬP Rorel Inkhawm vawi 6-na, February 27, 2015 zana Mission Veng biak-ina ṭan chu nizan khan a ṭiak. KṬP inkhawmpui hian Mizo­ram tana chaw ngheia sual thupha chawina ṭawngṭai rual neih an rel.

Inrinni khan CKṬP leader Rev. J Lalremsiama kaihhruaiin, rorel inkhawm neih a ni a, rorel palai 828 an kal.

An tuhrelte zingah - Central KṬP-in ram pum huap­in Zoram tan chaw ngheia sual thupha chawi ṭawngṭai rual buatsaih te, Youth Recreation Centre pualin KṬP member tin, Aizawl khawpuia mite'n Rs. 50, district capital-a mite'n Rs. 30 leh hmun dang zawnga mite'n Rs. 20 thawh khawm leh, YRC pual vekin Thawhṭanni zan inkhawm thawh­lawm ṭum khat lak khawm a tel.

Kum 2017-a KTP Rorel In­khawm chu March 3-5, 2017 chhungin Bawngkawn Kohhrana neih turin an rel a; kum 2015-16 Central KṬP budget atan Rs. 43,30,000 an pawm a, kumpuan thupui atan 'Pathian nena lên dun' tih an thlang.

KṬP-ah hian pastor bial 188-ah branch 816 awmin, member 1,38,871 an awm a, member-te hi mipa 87,100 leh hmeichhia 51,771 an ni.

Mission Veng branch-ah member tam berin mi 1,496 an awm a, Chanmari branch (1,214) leh Ramhlun North branch (1,189) ten an dawt. Member tlemna ber branch, Chikhurlui branch (Vaṭhuampui bial)-ah member pathum an awm.