CM-in tum 15 helicopter a hmang tawh Hmanna sum senso zat a hriat theih loh

Chief minister Lal Thanhawla chuan kum 2012-a Mizorama Pawan Hans helicopter a service ṭan aṭanga tun thlengin helicopter ṭum 15 a hmang (hire) tawh a, tum khat dang mi pangngaite zing­ah ticket lain a zin. Helicopter atana CM sum hman zat hi ticket dang man nen a hlawma pek a nih vang­in hriat theih a ni lo.

CM Lal Thanhawla'n helicopter hire-a ṭum 15 a zinnate chu - Aizawl-Vanghmun, Aizawl-Chawngte, Aizawl-Saiha, Aizawl-Mamit, Aizawl-Lunglei, Aizawl-Kolasib, Aizawl-Lunglei, Aizawl-Haflong, Aizawl-Mamit, Aizawl-Champhai, Aizawl-Shillong, Aizawl-Guwahati, Aizawl-Mimbung, Aizawl-Champhai, Aizawl-Mimbung te a ni.

Helicopter chuan hmanna man hi hire a nih chuan darkar khatah Rs. 70,000 a ni a, darkar khat an hmang tling lo a nih chuan an hman zat minute a zirin pawisa an chawi ṭhin. Vawi 15 helicopter a hire bakah, ṭum khat Aizawl aṭanga Lawngtlai a zin tumin khualzin pangngaite angin ticket a la a, chuta a chuan man chu Rs. 3,300 a ni.

Mizoramah August 14, 2012 aṭangin helicopter a service ṭan a, Chief Minister leh Governor ten helicopter an hire-na sum chu passenger-te hmanna sum nen a hlawmin sorkarin Pawan Hans company-ah a pe ṭhin a, hei vang hian CM zinna senso zat hriat a harsa niin an sawi.

Chief minister-in helicopter a hman hian hmun ṭhenkhatah chuan a kal lam leh a haw lam an hruai cháng a awm a, kal lam leh haw lama a hman loh cháng a awm bawk. Shillong leh Mimbunga a kal hian a kal lam leh haw lamah helicopter a hmang ve vea thu dawn a ni.

GAD-a Civil Aviation Wing chuan tun hnai khan Mualpuia helicopter ṭumna tur hmun (helipad) siamna atan PWD-ah cheng nuai 50 an pe a, PWD lamin ṭumhmun an siam dawn a ni. Mualpuia helicopter an riahtir hian Ṭhuampuia sipai helipad-a zan riahtir lai aiin chêt vel a awlsam a, zan riah man pawisa chawi a awm ve lo bawk tih an sawi.

Helicopter hi Aizawl aṭangin khaw 10 - Saiha, Lawngtlai, Chmaphai, Khawzawl, Lunglei, Chawngte, Hnahthial, Serchhip, Kolasib, Mamit leh Ngopa-ahte a service mek a; North Vanlaiphai leh Saitualin a khuaa helicopter service an dil mek.