Kohhran hlimna vangin exam ṭhulh lo

Tunlai hian Mizoram khawchhak lam, Kelkang khuaah Pathian thua hlimna a thleng mek a, June 12, 2013 zan aṭanga nizan thleng khan zantin an la inkhawm ziah a ni. Kohhrana hlimna an chan avang hian zirlaite zingah exam theih loh phah an awm lo niin an sawi.

Kelkang Presbyterian Kohhran upa, P Papianga sawi danin, an kohhran hlimna avangin zirlaite an zirnaah an khaihlak an hlau hle a, theihtawp chhuahin ṭan an la a; tun thlengin zirlai exam thei lo an awm lo a, mikhual nei reng mah se, ei leh in lamah harsatna an la tâwk lo a ni.

Papianga chuan, hun eng emaw chen aṭang khan an khuain chawhrualin mikhual 100 vel nei reng an nih thu thu a sawi a; Kelkang Kohhran hlimna chhim turin Mizoram hmun hrang leh Manipur, Tahan leh Shillong aṭangtein an khua tlawhtu an awm reng a, chawhrualin zan tin mi 500-700 inkar inkhawm ziah anga an inchhût thu a sawi.

Upa P Papianga chuan, "In tinah mikhual 7-10 vel zel awm ang kan ni a, mikhualte an hawihhâwm em em vek a, buhfai leh chawhmeh rawn kengte pawh an tam a, harsatna kan tâwk lo," a ti a; tui lamah an harsa deuh niin a sawi a; eizawnna leh hnathawhna erawh a nghawng deuh tih a sawi bawk.

Kelkang Kohhranah hian June 7, 2013 aṭangin hlimna an nei ṭan a, June 12, 2013 aṭangin zan tin an la inkhawm a, zing leh chhunah chuan an bethel ṭhin. Mikhualte chu ni hnih/khat an chám ber a, rei tak tak chám pawh an awm a; mikhual lut thar leh haw an awm reng a ni.

Kelkang hlimna hi nimin, Pathianni khan Health minister Lal Thanzara pawhin a chhim a; Assembly speaker Hiphei pawhin a lo chhim tawh bawk.