Borapansury-a balu lakna hawng leh

Borapansury bula India leh Bangladesh inrîna ramri kianga India mi (Mizoram mi)-te'n balu an lâkna hmun chu hun rei tak chhung Border Guard Bangladesh (BGB)-ten an khuahkhirh hnuah, ram pahnih aiawhte in­biakremna avangin hawn ṭan leh a ni.

Borapansury bula balu lâkna lui chu ram pa­hnihte inrina luia ngaih a nih avangin India ram lama luikam chu Borapansury leh a chhehvel mipuite balu lâk nan an hmang ṭhin a; mahse ramri hung a nih avang­in balu lakna hmun chu khawi ramah mah a bet lo nia sawiin, Bangladesh sipai - BGB-te chuan 'No Man's Zone' a nia sawiin balu lâk theih loh turin an khuahkhirh a ni.

Balu lakna hmun vel chungchangah hian Border Security Force (BSF) leh BGB hotute chu an inbia a, an inbiak rem hnuah luia balute chu a duh apiang tan lak theih an hawng leh ta a ni.

Borapansury kianga luang luia balu lâkna hmun hi India ram chhung­a ngaih ni mah se, lui aṭanga metre 150 vela hla India ram chhungah ramri hung a nih thu leh, ramri hungna páwn lam chu India-in a chán ta anga tual­chhung mi tam takin an ngaih thu, hmun tlawhtu Tlabung Post editor chuan Vanglaini a hrilh.