Inpumkhat nan Hindi thiam a pawimawh - School Education Minister

Mizoram Hindi Prachar Sabha chuan nimin khan an pisaah Hindi lama padma shree dawngte leh doctorate degree neite chawimawina an buatsaih a; khuallian Lalchhandama Ralte, School Education minister chuan, India ram inpumkhatna atan Hindi thiam a pawimawh thu a sawi.

Lalchhandama Ralte chuan, Mizoram sorkara thuneitu sangte leh officer-te zingah pawh Hindi-a ṭawng thei lo tam tak an awm thu sawiin, Prachar Sabha pawhin nasa zawka hma an lâk a ṭul thu a sawi a, "Hindi hi middle school leh high school chinah chauh zirtir a ni a, primary school aṭangin zirtir ni se, naupangte'n an man chak zawk ang em tih ngaihtuah a ngai," a ti.

Minister chuan, Hindi zirtirtu nei lo sikulte chu sorkarin zirtirtu pek a duh tih sawiin, "Central sorkarah Hindi zirtirtu 950 kan dilah 650 pek kan ni. Hindi teacher hna lakah diltute'n an daih lo zawk. Hindi thiam mamawhna a sang hle a ni," a ti a; Hindi thiam indaih loh avangin tun dinhmunah Hindi teacher nawr belh zel chu thil tih chi a nih loh thu a sawi.

Inkhawm hi Mizoram Hindi Prachar Sabha chairman RB Lalmalsawma'n a kaihruai a, Hindi lama padma shree dawng pakhat leh doctorate degree nei mi 13 hnenah chawimawina thuziak an hlan a ni.