Zirlai hruaitute'n politics khelh nan an hman chuan kan inhmachhawn a ṭul ang: CM Hawla
Chief minister Lal Thanhawla chuan, zirlai pawl hruaitute'n zirlaite hamṭhatna tur kalpui se a duh thu a sawi a, zirlaite hamṭhatna ni lo a, politics khelh nana an hmang a nih chuan an inhmachhawn a ṭul tur thu a sawi.
CM Lal Thanhawla hian Febnruary 28-a Vanapa Hall-a Aizawl City College Joint Students’ Union (ACCJSU) General Conference a hmanpuinaah thu sawiin, "Zirlai pawl hruaitu ṭhenkhatte hi chuan politics kailawnah an hmang ta mai em ni tih tur khawpin an awm ṭhin. Zirlaite hamṭhatna tur an kalpui chhung chuan sorkar ang pawhin kan thawhpui thei a, politics khelh nan an hmang a nih chuan kan inhmachhawn a ṭul ang," a ti.
Lal Thanhawla chuan, zirlaite chu nakina an inchhìr lohna turin an hun ṭha hmang ṭangkai se a duh tih sawiin, 'Zirlaite hi nakina ram hruaitu tur an ni' tia sawi ṭhin chu a dik theihna turin taimakna leh tumruhna nena lehkha zir turin a fuih.
Mizoramah hna siamtu lian ber chu sorkar a ni tih sawiin Lal Thanhawla chuan,, "Hna a tâwt tawh avangin a quality zawngin a kal dawn a, chhawr tlak thiamna neite chauh tan hna a awm thei ang. Chuvangin ṭhalaite tan ‘skilled development’ hi sorkarin a ngai pawimawh hle a ni," a ti.
Chief Minister chuan, "Mizote hi a hlanga kan awm avangin hnam dangte aiin Sap ṭawng leh Hindi kan thiam lo bik a, Manipur mi te, Naga-te leh Arunachal mite chuan ṭawng hrang hrang an hman avangin ṭawng tualléngah Sap ṭawng emaw Hindi an hmang a, an harsat lem lo. India ram zau zawka thawk thei tur leh Central service-a lut thei tur chuan English leh Hindi thiam a ṭul," a ti a; BJP sorkar chuan an lehkha an thawnte Hindi vekin an ziak tawh tih a sawi.
ACCJSU conference hi an pawl vice president Ricky Lalchhandama'n a kaihruai a, college principal-te hnenah chawimawina thilpek an hlan.