Covid-19: Mizoram dinhmun Chhuahtir tawh zat - 95.39%

October 18, Pathianni khan Mizoramah Covid-19 vei hmuh chhuah a awm lo a, nimin khan Serchhipah mi pahnih hmuh chhuah a ni thung. Nimin khan hripui laka fihlim tawh mi pathum chhuahtir an ni a; Mizoramah hripui vei hmuh tawh mi 2,255 zinga mi 2,151 (95.39%) an chhuak tawh.

Mizorama Covid-19 positive hmuh chhuah tawh mi 2,255-te chu mipa 1,839 leh hmeichhia 416 an ni. An zinga mi 2,151 (95.39%) chu chhuahtir an ni tawh a, enkawl mek mi 104 (4.61%) an awm. La chhuak lo zingah hian hripui vei tawh lo an awm nual.

Pathianni khan ZMC laboratory khâr a nih avangin swab sample endik a ni lo a; TrueNAT-PCR hmangin Khawzawlah chiah sample endik niin, endik 11-te an negative vek. Rapid Antigen Test (RAT) hmanga district pathuma endik mi 163-te'n hripui an kái lo tih hmuh a ni bawk.

Nimin khan Mamit CCC aṭangin Covid-19 vei tawh lo mi pathum - mipa pahnih leh hmeichhia pakhat chhuahtir an ni.

Hetih lai hian, nimin khan Serchhipa RAT hmanga swab sample endiknaah Covid-19 positive mi pahnih hmuh chhuah a ni a; tualchhunga kái chhâwng (local positive contact) ve ve an nih bakah, an kai chhan hriat chian a ni lo. 

Serchhip aṭanga thu dawn danin, nimina Serchhipa Covid-19 vei hmuh chhuahte chu Chanmari Venga mipa kum 45 mi leh P&E Venga hmeichhia niin, tualchhunga kái chhâwng an ni a; insawiselna an neih avangin District Hospital-ah RAT hmangin an sample endik a ni.

Covid-19 positive mipa zawk awmna Serchhip Chanmari Village Task Force chuan District Bawrhsap hriatpuinain nimin chhùn aṭang khan an vengah inkhàrkhip kalpui nghal a nih thu an puang a; an véng mite chu páwna chhuak lo tur leh veng dang mite pawh an veng chhunga léng lut lo turin an hriattir.

Serchhip Chanmari Veng VTF chuan, an venga Covid-19 vei nena October 4, 2020 hnu lama inkâwm hnaite chu VTF hruaitute hnena inhriattir tur leh ina inkhung hrang nghal turin an inhriattir bawk.

P&E Vengah erawh chuan lockdown puan a ni rih lo a, dawrte erawh chu hawng lo turin an inhriattir thung. Chanmari Veng pa hi auto-ricksaw khalha eizawng a ni a, a chêttlat tamna Bazar Vengah chuan nimin chhun aṭanga nizan zanlai thleng khan lockdown an puang a ni.