Dr Lalṭanpuia fate zar buai lo tur leh thlalak tidarh lo turin hriattir

Child Welfare Committee (CWC), Aizawl chuan nimin khan thupek (order) chhuahin, December 9, 2020 zana kut tuara thi Dr Lalṭanpuia, Kulikawn fate chu zar buai lo tur leh an hming, thlalak leh nihnate media-a tidarh lo turin mi tin an hriattir.

CWC chuan, Dr Lalṭanpuia thihna chungchangah, a fate himna leh zahawmna vawnsak ṭula hriat a nih thu tarlangin, "Enkawl leh venhim mamawh an nihnate hriain The Juvenile Justice (Care and Protection of Children) Act, 2015, Chapter-V, Section 29-in thuneihna a pek angin thuchuah siam a ni," a ti a; CWC thuchhuah bawhchhiate chu dan anga hrem theih an nih thu an tarlang.

Vanglaini palai zawhna chhángin CWC, Aizawl hotute chuan, an thuchhuah chu an bawhzui zel dawn thu an sawi a; YouTube-a video-te pawh Dr Lalṭanpuia fate lanna a awm a nih chuan a dahtute'n an paih tura an ngaih thu leh, an paih lo a nih chuan paih tura an la hriattir a rinawm thu an sawi bawk.

CWC, Aizawl thuchhuak

1.    Dr Lalṭanpuia thihsan a fate hi naupang kum tling lo an la nih avangin anmahni zar buai a, an rilru tihrehawma tichî-âi thei záwnga kawm leh zawhna zawh phal a ni lo.

2.    Dr Lalṭanpuia thihna chungchang leh a kaihhnawih thilah thuneitute phalna la hmasa lo chuan a fate hi hruai chhuah leh lâk hran phal a ni lo.

3.    Dr Lalṭanpuia fate hi an pa an sùn avangin rilru na takin an awm mek a, an rilru tihrehawm belh thei tur ang chia hmalakna neih phal a ni lo.

4.    Social media leh news channel-ah Dr Lalṭanpuia fate hming leh an nihna tihlan te, an thlalak tàr chhuahte phal a ni lo.