Lui dung humhalh dan tur sawiho

Nimin khan Fisheries minister K Lalrinliana hoin a pisaah Central YMA hruaitute leh Fisheries department hotute'n lui dung leh nungcha humhalh kawnga thawhho dan tur an sawiho.

K Lalrinliana chuan, Mizoram lui dung humhalh a pawimawh thu sawiin, "Sanghaa intodelh tur chuan sangha khawi mai ni lo, kan ram luia sangha awmte humhalha inthlah puntir zel a pawimawh. Kan luite ṭangkai zawka hman theih turin humhalh leh awmze neia enkawl a pawimawh a, mipui vantlang tan ei hmuhna tling a ni thei," a ti.

Fisheries secretary Lalzirmawia Chhangte chuan, The Mizoram Fisheries Rules, 2019 chungchang a sawifiah a; dan chu hman a nih a, chak zawka hmalak theihna turin YMA-te tha chakna sorkarin a mamawh thu a sawi.

Central YMA hruaitute chuan, lui dunga nungchate humhalhna kawngah sorkar nen an thawk dun thei tur chu lawmawm an tih thu leh, lui dung humhalh chu YMA-in hun rei tak aṭanga an buaipui tawh a nih thu an sawi bawk.