MPCC-in curfew hun sawn hlat an duh

Mizoram Pradesh Congress Committee (MPCC) chuan, district khawpuia zana curfew avangin Krismas inbuatsaihna kal mekah mipuite'n harsatna an tâwk nia hriain, zan curfew ṭan hun sawn tlai turin December 17, Ningani khan Health minister Dr R Lalthangliana an ngen.

MPCC chuan, Mizo Kristiante hunpui ber Krismas urlâwkin Covid-19 hripui karah pawh mipui himna tura sorkarin kaihhruaina a duante zàwm chungin inbuatsaih mek a ni tih an tarlang a, "He hunpui hmang tura kan inbuatsaihna kal lai mek hi zan curfew dar 8-ah ṭan a nih avangin sumdawng, mimal leh chhungkaw tam zawk tan harsatna a siam nasa hle niin kan hria," an ti.

Thlasikah ní a rei lo a, khua a thim hma hle tawh tih tarlangin MPCC chuan, "Mizo Kristiante hunpui Krismas atana inbuatsaihna hun tam zawk kan neih theih nan curfew ṭan hun hi tihdanglam a hun tawhin kan hria," an ti a; hunpui thleng tura kohhran, pawl, mimal leh sumdawngte’n inbuatsaihna hun tam zawk an neih theih nan curfew chu zan dar 9-ah sawn hla turin an ngen a ni.