Mizoramah contact tracing-ah Mi 19,454 chhui an ni tawh
Covid-19 veite'n an kài chhàwn theihte chhuina (contact tracing)-ah Health department-a contact tracing team chuan nimin chhun thleng khan mi 19,454 an chhui tawh. Hetih lai hian, awlsam zawka Rapid Antigen Test hmanga swab sample endiktir theihna tur 'kiosk' bunna tur ruahman tawh a ni.
Health minister Dr R Lalthangliana hoin nimin khan Health department hotute'n Covid-19 donaa an hmalaknate SAD Conference Hall-ah an thlirho a; contact tracing team-te'n an hmalaknate sawiin, contact tracing-ah mi 19,454 an chhui tawh thu an sawi.
Contact tracing team-te chuan an harsatna tawhte sawiin, a theih chin chinah mipuiin an veivahna chhinchhiah uluk se an duh thu an sawi a; city bus, taxi, two-wheeler taxi, maxicab-a chuangte'n motor number leh an chuan hun chhinchhiah ṭhin se an duh thu leh, a bik takin sikul káiten ngai pawimawh se an duh thu an sawi. Health department contact tracing team-ah hlawh beisei loa inpe (volunteer) 15 an awm mek a ni.
Ṭhutkhawmah hian awlsam zawka RAT hmanga swab test tihna tur Kiosk siam chungchanga hmalakna sawi lan a ni a; Kiosk bunna tur hmun ruahman fel a nih tawh thu te, tih tur ṭulte buaipui mek a nih thu leh, hman ṭan thuai a nih tur thute an tarlang.
Health Minister chuan, Covid-19 vei hmuh chhuah a tlêm tâk avanga inthlahdah a pawi theih thu sawiin, "Tunlaia positive hmuh tharte chu symptom nei an ni tlangpui tawh a, kan fimkhur lehzual a ṭul. Inringhlel emaw, positive contact nei an awm emaw a nih chuan a rang thei ang bera test zel a pawimawh," a ti.
Meeting-a tarlan dang ṭhenkhat
Virus Research and Diagnostic Laboratory (VRDL) bun turin chak taka hmalak a ni a, laboratory awmna tur in sak hna a chanve vel thawh a ni tawh. Kháwl bun tur a thleng kim tawh a, thawktu mi 10 vel tana mamawhte chu ICMR-in a tum dawn a, Mizoram sorkarin kháwl mamawh a tum ve thung ang.
Mizoramah covid care centre (CCC) 41 leh community covid care centre (CCCC) panga a awm mek. Aizawl district bikah CCC 25 a awm a, Covid-19 positive 500 vel tum ṭhata enkawlna tur BSUP building, Durtlang peih a ni tawh.