Chhungkaw 6,900-te sawhthing a tám; Horticulture dept.-in beihpui an thlak dawn

Kuminah Mizoramah sawhthing chíng chhungkua 25,102 an awm a, chu'ng zinga chhungkaw 6,900-te sawhthing a tám tawh. Horticulture department chuan August 15, 2024 aṭangin sawhthing tám beihpui thlâkna, Operation Ginger - Fehchhuah Rûnpui a kalpui dawn.

Horticulture department hotute'n nimina an officer leh field staff-te puala sawhthing tám leh natnate vên dan leh enkawl dan zirhona an buatsaiha an tarlan danin, Mizorama district tinah sawhthing, aieng leh hmarcha chìn a ni. District tinah sawhthing chíng awmin, an vaiin chhungkua 25,102 an ni a; Aizawl, Champhai, Serchhip, Saitual leh Khawzawl-te chu sawhthing ching tam zualna district a ni.

Nimin thlenga report an dawn chinah kumin hian district 11-a chhungkaw 6,900-te sawhthing a tám tawh a; sawhthing tám tam berna Saitual district-a khaw 43-ah chhungkaw 1,400-te sawhthing a tám.

Chhungkaw 3,415-in aieng an chíng a, Aizawl, Lunglei, Kolasib, Saitual leh Champhai district-te aieng chíng tam zualna district a ni. Chhungkaw 8,687-in hmarchate an chíng a; Aizawl, Lunglei, Serchhip, Khawzawl leh Saitual district-ah hmarcha chíng an tam zual.

Horticulture department chuan sawhthing tám beihpui thlâkna, Operation Ginger - Fehchhuah Rûnpui kalpui a tum a, August 15, 2024 hian Horticulture Directorate aṭangin Horticulture minister Prof. Lalnilawma'n a vailiam dawn.

Beihpui thlaknaah hian nimina training-a telte chu district tin tuamin an feh chhuak dawn a; kut hnathawktute harsatna tawh mek do letna chi khat atan sawhthing enkawl dan leh sawhthing bâwmtu rannungte chung­chang inzirtirna tur lehkhabu siam a ni.

Horticulture department hotute chuan, sawh­thing tám enkawlna damdawi a theih ang angin ngaihtuah mek a nih thu an sawi a; kut hnathawktute chu beidawng mai lo tur leh mithiamte thuràwn anga an sawhthing hmunte thâ thlah loa enkawl zel turin an chah.

Nimina 'Training of trainers for Operation Ginger, 2024 - Management of pest and diseases on ginger' hi Horticulture director CH Lalmuanpuia'n a kaihruai a; deputy director (HP) Dr Robert Lalrinsanga'n Hand Holding Policy chungchang a sawi. Deputy director (FI) Dr H Vanlaldinki'n officer leh field staff kal khawmte chu sawhthing tám leh sawhthing natna vèn leh enkawl dan a hrilhfiah a ni.