Sawhthingah grade ṭhen a ni dawn lo - Chief Minister

ZPM general secretary-te chuan August 12, Thawhṭanni tlai khan sawhthing chungchang chief minister Lalduhoma a pisaah an sawipui a; CM chuan, sawhthingah grade ṭhen a nih dawn loh thu a lo hrilh.

CM Lalduhoma chuan, ruahmanna hmasaah chuan sawhthing lei leh hralhah grade A leh B-a ṭhen tumna a awm thu a sawi a, "A chhan chu tun hma lamin sawhthing hralhah rilru pamham pu tâwk an awm ṭhin vang a ni. Ṭhenkhatin lei kai tifai mang lo leh a bûk rih theih nan tui leih huh duh tâwkte an awm ṭhin a, hei hian insumdawn tawn­naah harsatna a siam ṭhin tih kan hria a ni," a ti.

An sumdawnpuite nen thawhhona ṭha leh tlo an neih theih nan grade-a ṭhen tumna a awm tih sawiin CM chuan, "Amah­erawhchu, mipui lamin sorkar ruahmanna hi an hriat­thiam chiah loh avang leh kut hnathawktute rilru a hnual hlauin he ruahmana hi mipui hriat­thiam zawnga her rem a ni," a ti a, grade A leh B a awm dawn loh thu a sawi.

Chief Minister chuan, sawhthing chíngtute'n an hralh dawnah an sawhthing chu a fai ṭha tur a nih thu sawiin, "Rilru pamham pu leh hlâwk lutuk tum avanga insumdawn tawn nana him lo thil ti an awm a nih chuan a hralhna kawngah harsatna an tâwk a nih pawhin sorkarin mawh a phur dawn lo," a ti.

Thlai thar lei chu sorkar flagship pawimawh ber a nih thu sawiin Duhoma chuan, "Inthlan hma aṭanga mipui hnena kan aupui tawh a ni. Kut hnathawhtute khaichhuahna tura hmalakna pawimawh a ni a, Pathian pawhin mal a sawm ngei kan beisei a, mipui kan tibeidawng thiang lo. Kan ruahmanna a hlawhtlin theih nan a mawhphurtute'n ngawrh takin an thawk mek," a ti.

CM Lalduhoma chuan, thlai thar lei leh hralhah hnam dangte'n Mizote hnam rinawm leh sumdawnpui tlakah ngai se a duh thu sawiin, "Tun hma thil avanga mipui rilru puthmang kal dik tawh lote pawh siamṭhat kan inbeisei. Mipui sorkar kan nih angin thil ṭha turah chuan mipui aw kan ngaithla zel dawn," a ti a; a ṭul hunah chuan huaisen takin an dinnaah an din tlat thung thu a sawi bawk.