Sumdawnna lirthei permit pe chhuak lo; Zir chian a ni dawn - Transport Minister

Mizoramah ZPM party kaihhruai sorkar a pian hnuah Transport depart­ment chuan sumdawnna lirthei permit a la pe chhuak lo. Department hian sumdawnna lirthei dinhmun an zir chiang dawn.

Vanglaini palai zawhna chhangin Transport minister Vanlalhlana chuan, sorkarna an chan hnuah sumdawnna lirthei permit an la pek chhuah loh thu a sawi a, "Dilna chu a rawn lut hnem tawh khawp mai. Mahse, eng sumdawnna lirthei permit mah pek chhuah a la ni lo," a ti.

Transport Minister chuan, tun dinhmunah sumdawnna lirthei permit pek chhuah tumna an nei rih lo tih sawiin, "Kan hun chhungin kan pe chhuak miah lo ang chu kan ti lo a, tun dinhmunah chuan pek chhuah kan tum rih lo," a ti a, sumdawnna lirthei nei sate'n tam an intih thu a sawi.

Sumdawnna lirthei dinhmun an zir chian dawn thu sawiin Minister chuan, "Uluk takin kan zir chiang ang a, chumi aṭang chuan thutlukna kan siam ang. Pek chhuah belh a ngaih leh ngaih loh zir chian hnuah a chiang thei ang," a ti.

Transport Minister chuan, Aizawl pawn lamah chuan a bikin two wheeler taxi leh taxi-te a la thâwl deuh thu sawiin, "Chuti chungin district dangah pawh permit kan pe chhuak chuang lo," a ti a; district dang dinhmun pawh uluk taka zir chiangin, mamawh dan anga permit pek chhuah a nih tur thu a sawi.