Ram hmasawn ni tur chuan mi tin hi digitally literate kan nih a ngai - Larsap

Governor Dr Hari Babu Kambhampati chuan nimin khan Zuangtuia National Institute of Electronics and Information Technology (NIELIT) a tlawh a; ram hmasawn leh changkang ni turin mi zawng zawng digitally literate an nih phawt a ngaih thu a sawi.

NIELIT seminar hall-a inkhawmah Larsap chuan, prime minister Narendra Modi kaihhruai sorkar laipuiin ngawrh takin Digital India campaign a kalpui mek tih sawiin, "Kum 2047 hma ngeia India ram chu ram hmasawn leh changkang (Viksit Bharat) nihtir hi kan PM thil tum ber pakhat a ni. Ram hmasawn leh changkang ni tur chuan mi tin hi digitally literate kan nih phawt a ngai," a ti.

Dr Hari Babu Kam-bhampati chuan, hriselna, zirna leh loneihahte digital technology-in hmasawnna nasa tak a thlen mek tih sawiin, "Digital technology chuan telemedicine hmangin hmun kilkhawr tak takah pawh quality healthcare a thlentir mek," a ti a; information technology leh electronics-in hma­sawnna a thlente chu mi tin ban phâka dah a ṭul thu a sawi.

IT leh electronics-in hma­sawnna a thlen rual­in, pawi khawihna (cyber crime) tam tak a thlen tih sawiin Gover­nor chuan, chu'ng har­sat­nate sukiang tura NIELIT-in cyber security a buaipui mek leh Lunglei NIELIT Extension Centre bun a ni chu lawm­awm a tih thu a sawi bawk.

NIELIT hotute chuan Governor hnenah hian artificial intelligent (AI) laboratory din chungchang te, NIELIT chu deemed university-a pawm mai tur a nih tawh avanga ram an mamawh belh chungchang te, LDC hna dil nana NSQF aligned certificate pawmsak ve tura an duhnate an lo thlen a; Larsap chuan bawhzui a tum thu a hrilh.

Governor hian NIELIT hmunhmate a fang kual a, NIELIT kawtah Lenhmui a phun nghal a ni.