Mizoramah thla sarih chhungin sikserh vangin mi panga an thi

National Vector Borne Disease Control Programme (NVBDCP) chuan nimin khan Hospital & Medical Education Auditorium-ah State Review Meeting an nei. Kumin January-July chhungin Mizoramah sikserh vei mi 12,290 hmuh chhuah a nih thu leh sikserh vanga thi mi panga an awm thu tarlan a ni.

Review meeting hi Health Services additional director (Malaria) leh NVBDCP state programme officer Dr Chawngthanchhunga'n a kaihruai a, Health & Family Welfare principal director Dr Vanlalsawma'n a hmanpui a; malaria, dengue leh chikungunya chungchanga Mizoram dinhmun an thlir lêt.

Ṭhutkhawma tarlan danin, January-July, 2024 chhungin Mizoramah sikserh vei mi 12,290 hmuh chhuah niin, chu'ng zinga mi 6,349 chu malaria PF an ni a; sikserh vangin mi panga an thi tawh a, Lawngtlai district-a mite vek an ni.

Kuminah kum dang aiin malaria PV a pung a; Lawngtlai, Lunglei, Mamit leh Siaha district-te sikserh vei an tam zual tih an tarlang.

Kumin January-July chhungin dengue vei mi 267 hmuh chhuah a ni tawh a, chikungunya vei mi pathum hmuh chhuah a ni tawh bawk.

HFW Principal Director chuan, natna laka invenna tura sorkar hmalaknate ṭha taka kalpui mek a nih thu a sawi leh hmun ṭhenkhata thawktu indaih lohnate siam rem zel a nih thu a sawi a; sikserh tamna hmuna thawktute chu theihtawp chhuaha thawk turin a fuih.

Ṭhutkhawmah hian district hrang hrang aṭangin district malaria officer leh VBD consultant-te an tel a, an district ṭheuh dinhmun an tarlang. Review meeting hi vawiinah chhunzawma zawh a ni ang.