ESI-ah mi 2,634 an inziak lut tawh

Labour, Employment, Skill Development and Entrepre-neurship (LESDE) minister Lalnghinglova Hmar hoin nimin khan Secretariat conference hall-ah State Insurance Corporation Regional Board Mizoram an ṭhukhawm. Chak zawka Ministry of Labour & Employment hnuaia Employees’ State Insurance (ESI) Act kalpui dan tur sawiho niin, Mizoramah ESI-ah mi 2,634 an inziak lut tawh tih tarlan a ni.

Lalnghinglova Hmar chuan, ESI Corporation (ESIC) hnuaia hamṭhatnate chu a taka hmang ṭangkaitu nih tum ṭheuh turin kal khawmte a chah a, "ESIC hnuaiah hian kan mi chhawrte tan hamṭhatna hrang hrang - damlo inenkawlna, hnathawhnaa inhliam palh vanga chhawmdawlna, vanduaina vanga ramtuileiloa awmte ṭanpuina thlenga a huam avangin thawktute leh chhawrtute tan thil pawimawh a ni," a ti a; ESIC-ah a tam thei ang ber an inziah luh theih nan thawhpuiah kalkhawmte a sáwm.

ESIC (NER) regional director Robert Guite leh East and North East Zone medical commissioner Dr Richita Biswas ten Mizorama hmalakna kalpui tawh dan leh hmachhawpte an tarlang. Mizoram Private School Owners Association, Mizoram Non-Government Hospital Association, Automobile Workshop Owners Association, NTUM, FOTUM, CITUM leh LESDE department hotute an tel a ni.

Ṭhutkhawma tarlan danin, kum 2022-23 chhung khan Mizoramah ESI-ah mi 1,960 an inziak lut a, nimin (August 13) thleng khan mi 2,634 an inziak lut tawh. ESIC hian India ram pumah damdawi-in 161, dispensary 1,574 leh medical college 13 an thawhpui mek a; ESI-a inziak lut fate tan ESIC medical college parukah seat hauh a ni.

Aizawla ESI Dispensary-in Synod Hospital, State Referral Hospital, Aizawl Adventist Hospital, Nazareth Hospital (Chaltlang), Trinity Diagnostic Centre leh Genesis Laboratory-te an thlun zawm mek a; he'ngahte hian ESI-a inziak lutte chuan a thlâwnin enkawlna (OPD/admit/test) an dawng thei.

ESI Act chungchang hriat chian duh nei tan phone number 0389-2913623 leh 9999573504-ah zawh theih a ni.