NIRF Rankings 2024 tihchhuahah PUC 35-na leh MZU 77-na an ni

National Institutional Ranking Framework (NIRF)-in India rama zirna-in sangte ranking a tihchhuah thar ber, NIRF Rankings 2024-ah college zingah Pachhunga University College chu 35-na a ni a, university zingah Mizoram University chu 77-na a ni. MZU leh PUC-te hi ranking-ah pakhatin an tlahniam hret ve ve.

NIRF Rankings 2024-ah hian PUC chu 35-na niin, college ṭha zual 100 thlan chhuah zinga hmarchhak state aṭanga college lang awm chhun a ni a; Delhi-a Hindu College chu pakhatna a ni. PUC hi NIRF Rankings 2023-ah khan 34-na a ni a, kuminah a tlahniam hret a ni.

India rama university zingah Mizoram University chu 77-na a ni a, NIRF Rankings 2023 khan 76-na niin, kuminah a tlahniam hret. University ranking-ah hian Indian Institute of Science, Bengaluru chu pakhatna a ni.

University ranking-a top 100-ah hian hmarchhak state aṭangin MZU bakah university dang pahnih - Gauhati University, Assam (40-na) leh Tezpur University, Assam (60-na)-te an lang.

India ram puma zirna-in sang (college leh university) ṭha tehnaa a pumpuia pakhatna chu Chennai-a Indian Institute of Technology, Madras a ni.

NIRF hi sorkar laipuia Ministry of Education (tun hmaa Ministry of Human Resource Development tih ṭhin)-in a siam niin, September 29, 2015 khan tlangzarh a ni a; India rama zirna-in sang - university leh college-te tehna hrang hrang hmangin an endik a, ranking pein an tichhuak ṭhin.

Kuminah hian zirna-in 3,500 vel endik niin, August 12, 2024 khan NIRF Rankings 2024 chu tihchhuah a ni a; zirna-inte chu chi hrang (category) 11-ah (overall ranking telin) ṭhen a ni.