KHAWTHLIR

Inhnukdâwk awm lo

August 22, 2024-a AMC Ward-VI by-election neih tura chuh tuma hming pe lutte zingah inhnûkdâwk an awm lo. Inhnuhdawh theih hun a tâwp tawh a, inhnûkdâwk an awm loh avangin AMC by-election-ah hian candidate pathum - Chawnghmingthanga (BJP), H Lalremtluanga (ZPM) leh Lalrinfeli (Independent)-te an awm dawn ta a ni.

Sangha no chhuah

Champhai District Committee on Post Completion Management & Maintenance of Dam Reservoir cum Recreation Centre at Keilungliah chuan nimin khan Keilungliah tuikhuahah sangha chi hnih - Indian Major Carp leh Exotic Carp no 96,000 an chhuah. He hun hi bawrhsap VL Remliana'n a hmanpui a, PHE department, DFDO, IPR, MJA leh tlawmngai pawl hruaitute an tel. Sangha no an chhuahte chu Fisheries Development Office-in an tum a ni.

Finance-ah bet dawn

Council of Minister ṭhukhawmin a lo rel tawh angin, Taxation Commi­ssionarate chu a nih ang angin Finance depart­ment-ah a bet tawh dawn.

Sangha no sem

Fisheries department chuan nimin khan Saitual district-a Phullen Circle-ah sangha no, IMC leh Exotic Carp Fingerling pakhat Re 1 zelin sangha khawitute hnenah an sem. Sangha no sem hi chhunzawm zel tum a ni.

Outreach programme

Zirtiri Residential Science College-a Biochemistry department chuan nimin khan Ramhlun Venglaia Public Higher Secondary School-ah ‘Health and Wellness’ tih thupui hmangin outreach programme an buatsaih. Public HSS zirlai 130 an tel a; blood pressure leh a pawimawhna te, body mass index (BMI), blood group leh a kaihnawih hrang hrang pawimawhnate an zirtir a, a takin an tihpui bawk.

Kuhva rah man

Assam Rifles sipaite chuan August 12, Thawhṭanni khan Champhai district-a Ngur khaw huam chhungah mi pakhat hnen aṭangin ram dang kuhva dan loa lak luh nia hriat ip 46 an man a, Champhaia Customs Preventive Force hnenah an hlan. Kuhva an man hi cheng nuai 25.76 hùa chhût a ni.

Exhibition buatsaih

Kolasib DC Robert C Lalhmangaiha chuan nimin khan Kolasib Venglai bazarah Partition Horrors Remembrance Day puala Lead Bank buatsaih exhibition a hawng a; sipai báng (ex-serviceman)-te bakah, CZ Higher Secondary School leh St John Higher Secondary School zirlaite an tel. Exhibition-ah hian partition puala thuziak leh partition hun laia chanchinbu thlalakte pho chhuah a ni.

Thutiam sawi rual

Social Welfare & Tribal Affairs directorate-a thawkte leh Eklavya Model Residential School-a thawkte chuan August 12, Thawhṭanni khan Nasha Mukt Bharat Abhiyaan (Drug-Free India Campaign) pualin ruihhlo laka fihlim turin thutiam an sawi rual.

Award siam rel

Serchhip District Task Force for Immunization chu an chairman Paul LKhuma, bawrhsap hoin nimin khan an ṭhukhawm. Hri danna hrang hrang pekah Serchhip district-ah bituk (target) zat an tlin lo tih tarlan a ni a; thawktute tihphûr nan thawk ṭhate tan lawmman (award) siam an rêl. Kum 2023-24 leh kum kal meka hri danna pek dan thlir lêt a ni a, kum kal mekah June thla thlengin 85.8% an tuam tawh a, kum kal taah 69% an tuam tih tarlan a ni.