Tribal Welfare & Development Policy zirho

Social Welfare, Tribal Affairs, Women & Child Development (SWTAWCD) department hnuaia State Tribal Resource & Training Centre (STRTC) chuan nimin khan Aijal Club-ah State Tribal Welfare & Development Policy, Mizoram zirhona an buatsaih a, Social Welfare minister Lalrinpuii'n a hmanpui.

Lalrinpuii chuan, State Tribal Welfare & Development Policy chu State Tribal Resource & Training Centre hmalakna turah hmasawnna thlen thei tur a nih thu a sawi a; policy chungchangah ngaihtuahna sènpui turin kal khawmte a sáwm.

SWTAWCD secretary Lalzarmawii pawhin thu sawiin, Tribal Affairs lama state hmalakna thuam chak turin UNDP-in thawktu pali an rawn pek tur thu a sawi.

Zirhona hi SWTAWCD director Dr Lalhriatzuali Ralte-in kaihruaiin, State Tribal Policy tura STRTC-in a lo duan tawh leh mithiamte zirchianna chungchang a sawifiah a; sorkar department hrang hrang hotu te, tlawmngai pawl aiawh te, Social Welfare department officer lo ni tawh te, IAS Association (Mizoram) aiawh te, Mizorama hnam chi hrang hrang aiawhte leh media mite an tel a ni.