HPC Vice Chairman-in sorkar laipui a dawr

Lunglei High Powered Committee (HPC) vice chairman V Malsawmtluanga, MLA chuan tun hnai khan New Delhi-ah sorkar laipuia ministry/department hotute a dawr.

V Malsawmtluanga hian Ministry of Information and Broadcasting director Armstrong Pame, Ministry of Consumer Affairs, Food and Public Distribution joint director Lal Ramdinpuii Renthlei, National Scheduled Tribes Finance and Development (TRIFED) managing director T Roumun Paite, Ministry of External Affairs joint secretary B Vanlalvawna leh BSF additional director general Puneet Rastogi te a kâwm a ni.

Armstrong Pame nen an inkawmnaah V Malsawmtluanga chuan, Mizoram hmasawnna tura a ngaih pawimawhte a hrilh. Armstrong Pame chuan, Mizorama district panga tan private company hmangin movie theatre/cinema hall an sak theih tur thu leh, hmunhma, tui leh power supply-te state sorkarin a lo buatsaih theih nan cheng nuai 30 ṭheuh an pek lâwk theih thu a sawi.

HPC Vice Chairman hian Lal Ramdinpuii Renthlei chu Mizoram hmasawnna tur thil hrang hrang a sawipui a; Mizoram tan sum a tam thei ang ber hnûk lut turin dawhthlêng an lo buatsaih tur thu a hrilh.

Lal Ramdinpuii Renthlei hi Lunglei HPC Adviser atan a sáwm nghal a; ani pawhin harsatna a awm a nih loh chuan tihhlawhtlin ngei a tum thu a sawi.

BSF ADG hnenah V Malsawmtluanga chuan Lunglei district-a BSF duty-na hmunah mipui nen inlaichinna ṭha zawk siam zel tur te, civic action programme kaltlangin khawtlang leh mipui tan nasa zawka rawngbawl tur te, BSF-a Mizote Mizorama dah hram hram turtein a ngen.

B Vanlalvawna nen an inkawmnaah V Malsawmtluanga chuan, Mizo officer rinawm leh hmingṭha, tun hma aṭang tawha Mizote tihmingṭhatu a nih avangin chhuanawm a tih thu a hrilh. B Vanlalvawna chuan, Mizoram mite India mi ram pawna awm mekte'n harsatna an neih chángin ministry/embassy kaltlanga an puih ṭhin thu leh, India mi ram danga harsatna tâwkte an ṭanpui theih reng thu a sawi.