Mamit leh Saitualah Tiranga Yatra

Independence Day lo thleng tur puala 'Har Ghar Tiranga' kalpui mekah nimin khan Mamit leh Saitualah 'Tiranga Yatra' huaihawt a ni a, zirlai ṭhahnem takin hnam puanzar kengin kawng an zawh.

Mamita Tiranga Yatra chu district bawrhsap Jacob Lalawmpuia'n kaihruaiin, zirlaite leh sorkar department hrang hranga thawkte'n hnam puanzar kengin Mamit Field Veng aṭanga High School Veng thleng kawng an zawh a; Har Ghar Tiranga thutiam an sawi rual. Nasha Mukt Bharat Abhiyaan campaign hnuaia ruihhlo laka fihlim tura intiamna hun an hmang nghal bawk.

Jacob Lalawmpuia chuan, India khua leh tuite'n hnam puanzar an zah a ṭul a thu sawiin, kawngzawha telte chu khua leh tui ṭha leh rinawm ni ṭheuh turin a chah a; ruihhlo laka fihlim tlat turin zirlaite a fuih a ni.

Saitualah chuan bawrhsap Dr Lalngura Tlau kaihhruai hoin Tiranga Yatra neih a ni a, Saitual Middle School I & II, Saitual High School, Saitual Higher Secondary School, Presbyterian English School leh Saitual College zirlai I-Day parade-a tel turte an tel.

Saitualah hian Chhimvenga CI Kawn aṭanga Keifang Centenary Sports Complex thleng hnam puanzar kengin kawng an zawh a; Har Ghar Tiranga thutiam, 'India ram puanzar zár a, kan ram tana zalenna sualtute leh mi huaisente zah tak chungin, keimah ngei pawh India ram ṭhan nan leh hmasawnna hna thawk turin ka intiam e,' tih chu an sawi rual a ni.