Kut hnathawktu hlawhtlingte chawimawi

Nimin khan Champhai DC conference hall-ah kut hnathawktu hlawhtlingte leh damdawi-in fai inelnaa lawmman dawngtu Champhai District Hospital chawimawina hun buatsaih a ni a, Lok Sabha MP C Lalrosanga, Champhai North bialtu MLA Dr ZR Thiamsanga leh East Tuipui bialtu MLA Ramthanmawia ten an hmanpui.

Kut hnathawktu hlawhtling chawimawina pekte chu mi pasarih an ni a, thuchei leh Rs. 5,000 ṭheuh hlan an ni. Kayalkap hnuaia damdawi-in fai inelna kum 2016-a neih ṭan aṭangin kumin thlengin Champhai District Hospital chu sorkar damdawi-in fai thlan pathum zingah a la tel ziah a, Clean, Beautiful and Healthy Champhai Town Committee-te'n chawimawina thuziak an hlân a ni.

Kut hnathawktu chawimawi zinga pahnih chu Agriculture department hnuaia mi an ni a; phai leilet bigha 36-a zau aṭangin buh ṭín 1,627 thartu KC Doliana, Vangchhia leh, tlang ram loa ṭin 4 hmuna buh ṭîn 738 thartu Lalthanchhunga, Khuangthing an ni.

Horticulture department hnuaiah mi pathum an awm a; ram hectare khata zaua grape puitling kûng 1,500 aṭanga quintal 137 thartu HS Vanlalfakzuala, Champhai IB Veng te, Ryozeki Variety zîkhlûm ṭin khat hmun aṭanga qtl. 95 thartu Lalchungnunga, Samthang leh, hmarcha tê ṭin 230 thartu Immanuela, Thekpui khuate an ni.

AH&Vety department hnuaiah vawk 43 vulhtu R Lalchhuanawma, Champhai Veng­sang leh sial 37 vulhtu K Vanhmingliana, Tual­cheng khuate chawimawina hlan an ni bawk.