Zirlaite'n Aizawlah kawng an zawh March 10 hmaa scholarship pek an phût

Sorkarin zirlaite scholarship a pek chhuah kim loh vanga lung­awi loh lantirin Mizo Students’ Union (MSU) general headquarters huaihawtin nimin khan Aizawlah zirlaite'n kawng an zawh. Post matric scholarship chu March 10, 2015 ral hma leh pre matric scholarship chu March 2015 chhung ngeia pek kim an phût.

‘Zirlaite chanvo rahbeh duh lohna kawngzawh’ tia an vuah hi chawhma dar 10:30-ah zawh ṭan a ni a; Sikulpuikawn leh Chanmari kâwn aṭanga zawh ṭanin, Vanapa Hall kawtah an intâwk khawm a, college zirlaite an ni hlawm.

Vanapa Hall kawta in­khawm­ah MSU president PC Lalrinhlua'n thu sawiin, post matric tribal scholarship-ah state sorkarin 10% (cheng nuai 538.39) a tum ve tur anga sawi chungchangah Chief Minister thusawi te, Home Minister R Lalzirliana thusawite leh sorkar thuchhuah kalhmangte a inang lo niin a sawi a, "Tu sawi ber nge rin tur tih kan hre lo a, sorkar thuneitute'n ziak ngeia an pek chhuahna tura thu an dah kan phût avangin kawng kan zawh a ni," a ti.

MSU president chuan, kum 2013-14 chhunga pre-matric minority scholarship pawh sem tawh mah se, Mizoram sorkarin a tum ve tur 25% (cheng nuai 758.98) chu tun thlengin a la pe lo nia sawiin, "Kum khat chhung zirlaite chanvo rahbehin a lo awm tawh a ni,” a ti a; sorkarin zirlaite chanvo kum khat chuang a pe duh lo chu mak an tih thu leh a rang thei ang bera pe chhuak tura sorkar an phût thu a sawi bawk.

Kawng zawhnaah hian zirlai ṭhahnem tak an tel a; thu chi hrang hrang hmangin an au rual a ni.

Kawngzawhnaa zirlaite resolution:

1. Kum 2013-14 a pre matric minority scholarship Mizo­ram sorkarin cheng nuai 758.98 zirlaite min batsak mek hi March 2015 ral hma­in min pe rawh se.

2. Kum 2014-15-a post matric tribal scholarship Mizoram sorkarin cheng nuai 538.39 min batsak mek hi March 10, 2015 ral hma ngeia pek chhuah a nih ngeina turin sorkar intiamkamna kan phût.