March thla chhungin sorkarin scholarship pek chhuah a tum

Higher & Techni­cal Education (H&TE) secretary K Lalnghing­lova chuan, nimin khan Aizawl Press Club-ah thuthar thehdarhtute a kâwm a; post matric tribal scholarship atana Mizoram sum tum ve tur chu zawn khawm mek a ni tih sawiin, "March thla chhung ngeiin sorkar chuan pek a tum," a ti.

K Lalnghinglova chuan, post matric tri­bal scholarship atan Mizo­ram sorkarin 10% a tum ve a ngai tih chu February 3, 2015-a sanction order an hmuh hnuah an hre chiah tih sawiin, "Zirlai hruaitute nena indâwrna a awm lo a, kawng an zawh tur pawh chanchinbu aṭangin kan hre chauh a ni," a ti a; zirlaite'n scholarship a pumpuia an hmuh theihna atan a awm awm pawt khawmin, sorkarin theihtawp a chhuah tih a sawi.

K Lalnghinglova tarlan danin, chief minis­ter Lal Thanhawla hoin Pathianni khan Home minister R Lalzirliana, H&TE minister R Ro­mawia leh State Planning Board vice chairman H Liansailova-te chu an in­hmukhawm a, zirlaite beisei anga sum dap khawm an rél a ni.

Mizoram sorkarin state share a tum ve tur hi cheng vbc. 3.16 a ni a, first installment-ah chuan state tum tur 10% tih a nih loh avangin state-in pawisa a thawh ve lo.

CM hoa ṭhutkhawm a nih hnu hian Home Minister-in zirlai hruai­tute chu kawng zawha mipui harsatna siam lo tura a ngen thu sawiin, H&TE secretary chuan, "Kawng an zawh chhan hi mipui tana harsatna siam hrim hrim duhna lian tak awm avang ni berin a lang thei. Sorkar inhawnna leh zirlaite a hriatthiampuina ngai pawimawh loin, kawng an zawh lui a ni," a ti a; kawng zawh vanga sâwt phah tur leh sâwt loh phah tur a awm lo niin a sawi.

Zawhna chhangin, H&TE secretary ṭawi­awmtu Mizoram Scho­larship Board (MSB) hotute chuan, March thla chhunga sum pek chhuah turah pre matric minority scholarship atana state share 25% a tel loh thu an sawi. Kum 2013-14 a pre matric scholarship atana state chu cheng nuai 758.98 (25%) a ni a, sorkarin a la pe chhuak lo.

MSB hotute sawi danin, pre matric scho­lar­ship atana sorkar lai­pui tum tur chu bank-ah deposit tawh a ni a, mahse sorkarin state share nena pek vek tur a tih avangin lak chhuah leh a ni.

MSB hotute chuan, scholarship dil a nih dawnin a diltute'n kum khata chhungkaw sum thawh chhuah zat (in­come ceiling) an ngaih pawi­mawh loh thu sawiin, "DC office aṭangin in­come certifcate an nei a, document an neih miau chuan kan chhungkaw hriat chian pawh ni se kan hnâwl ngawt thei lo. Income certificate chungchang hi DC hmasate pawh kan sawipui tawh," a ti.

Pre matric minority scholarship atana income ceiling chu Rs. 2,50,000 a ni a, post matric tribal scholarship-ah chuan income ceiling chu Rs. 2,00,000 a ni.