KHAWTHLIR
Maxi-cab stand
Aizawl Municipal Council-in Aizawl khawpui daiféma maxi-cab stand sawn chhuah chu nimin khan kalpui ṭan a ni a; khawpui daifêma stand thara ding ṭhahnem tak an awm laiin, zawm loa khawpui chhung aṭanga chhuak pawh an awm ṭeuha thu dawn a ni. Nimin vek khan maxi-cab stand thar hman ṭan dan hi AMC executive councillor Rosiamngheta hoin sawiho a ni bawk.
Science Centre tlawh
Planning secretary Dr C Vanramsanga chuan February 28, 2015 khan Mizoram Science Centre a tlawh a, tihhmasawn zel dan tur a enfiah. Mizoram Science Centre hi July 26, 2003-a hawn a ni a; kum 2014 thleng khan mi 2,57,024-in an tlawh tawh a, chung zinga mi 1,05,808 chu zirlai niin, mi 14,688 chu zirtirtu an ni.
Lehkhabu pe
R Lalhmangaihsanga chuan a lehkhabu buatsaih pathum, Mizo General Knowledge (Fifth Edition), Army Recruitment Guide, Men are from Mars Women are from Venus-te chu MJA public library-a dah atan a pe a, MJA chuan lawmthu an sawi.
Charity fund hlan
Presbyterian Kohhrana Central Kohhran Hmeichhe hruaitute chuan, nimin khan Synod Hospital-ah Charity Fund atan Rs. 6,23,133 an hlan. Pawisa hi kum 2014 chhunga Charity Fund puala an thawh khawm a ni.
Vaihlo zirho
Nimin khan Saiha DC conference hall-ah Anti Tobacco Awareness Training buatsaih a ni a, vaihlo leh a kaihhnawihin mihring taksa a tihchhiat dan leh a hlauhawm dante an zirho.
Taxi rate thar
State Transport Authority (STA)-in taxi chuan man thar a siam chu March 1 aṭang khan hman ṭan a ni.
CM relief fund
Congress Unit, Govt. Complex, Aizawl chuan chief minister relief fund-ah Rs. 5000 an chhung lut.