NH 54 kawng siamtute dan an ni

Kawnpui-Buichali Land Owners Association member-te chuan, nimin zing dar 6 aṭang khan NH-54 kawngpui laih zauhnaa an ram lakah zangnadawmna pek thuai phutin NH-54 kawng siam mektu PWD leh ABCI mi leh sa hna thawk turte an dang.

Chawhnu lamah ram neitute leh PWD hotute ABCI Camp-a an inbia a, hnathawh tihtawp rih a, ram lak tawh vawiina endik an rel. Hemi hnu hian ram neitute chu an haw a ni.

NH-54 kawng siam mekah hian a tira ram an laksakte chu zangna­dawmna pek an ni tawh a, a hnua ram lak belh leh neitute erawh pek an la ni lo. Zangnadawmna la pek lohte hian Kawnpui-Buichali Land Owners Association an din a ni.

Ram lak chungchangah hian nikum khan District Collector (Kolasib DC) thu angin enfiaha zangnadawmna pek zat turte chhût chhuah a ni tawh a, mahse PWD-in an la pawmpui (coutersign) thei hrih lo. Survey leh assesment hi March 11, 2015-a tih tura ruahman ni mah se, ram neitute'n hna thawk turte an dan avangin vawiinah tih a ni ang.

Ram neitute chuan, zangna­dawmna phût chu a tirah chuan mi 30 vel an ni tih sawiin, "A hmuna endik a nih hnuah compensation phût hi mi 87 kan tling. Heng zingah hian kan hriat ngai loh mi panga an awm a, ram pass an neih dan ziak lang lo pawh mi 15 an awm. Ram neitu dik tak, a chiang sate hi min pe thuai se la; endik an duhte chu a hrangin endik mai se kan duh," an ti.

PWD hotute chuan, mi 87-te zangnadawmna tur chu pawisa awm sain a daih loh tih sawiin, "Pawisa dil belh a ngai dawn a ni," an ti a; ram ennawn leh an duh chhan chu - mi dik lo hnena pawisa pek an hlauh vang a nih thu an sawi.