CYLA bandh siam chhan pakhat Lunglei-Lawngtlai kawng siam tan

Central Young Lai Association (CYLA)-in ni li chhung total bandh an huaihawt chhan zinga mi - Lawngtlai leh Lunglei inkar kawng siamṭhat hna chu nimin khan GP Project Ltd. ten an thawk ṭan.

Kawng siam hna thawktu tur GP Project project manager leh Central YLA hruaitute chuan Pathianni khan kawng siam hna thawh ṭanna tur Thingkah an tlawh a; GP Project hotute chuan, kawngpui siamṭha tur chuan kawng chhuat rual lo laite siam rual hmasak a ngai a, blacktop hna thawh hmain hna tam tak thawh hmasak a ngaih thu an sawi.

Central YLA chuan, hna ṭan a ni ta chu lawm­awm an tih thu sawiin, kawngpui ṭha tak neih a nih theihna atan theih­tawp chhuaha thawk tur­in GP Project hotute an ngen. Kawng ṭha taka siam a nih theihna atan ngun taka vil an tum thu sawiin, mipui leh lirthei khalhtute chu hna tikhaihlak zawnga awm lo turin an ngen bawk.

Lawngtlai leh Lunglei inkar kawng siamna atan hian cheng nuai 3403.21 ruahman a ni a, kum hnih chhunga zawh tur a ni.