Scho’ pek kim loh chhanah NDA puh

Congress party chuan thuchhuah siamin, Mizo Students Union (MSU) huaihawta Aizawla zirlaite’n kawng an zawh chu pawi tih thu an tarlang a; scholarship pek chhuah kim loh chhan chu sorkar laipuia NDA sorkar vang niin an sawi.

MPCC chuan scholarship-a harsatna chungchang sawiin, “A chhan pawh zirlaite ngen ber, scholarship 100% pe tura an tih chu Mizoram sorkarin sum harsa chung chunga tun financial year kan hman mek tawp hma, March, 2015 chhung ngeia pek a tiam tawh hnua kawng zawh lui an nih vang a ni,” an ti.

MPCC tarlan danin, Central-a UPA sorkar chhung zawng leh tun hma zawngin tribal scholarship chu Central-in a tum vek a, state sorkar tum ve tur a awm ngai lo a; NDA a sorkar leh hnuah state tum ve tur 10% an ruahman a ni.

Congress party chuan, 10% state sorkar tum tura tih chu Mizoram sorkar hriattir hmasakna awm loin, Mizoram sorkarin budget a duan fel vek tawh hnu, February 13, 2015-ah a hriattir chauh niin an sawi a; pawisa hman dan tur duan fel vek a nih tawh avangin siam rem hleih theih a ni tawh lo tih sawiin, chuti chung chuan zirlaite hmakhua ngaih vangin Mizoram sorkarin tih dan awm thei ang ang a dap a, March 2015 chhung ngeia pek kim a tum niin an sawi.

MPCC chuan, “He harsatna hi MNF telna NDA sorkarin tribal-te min duhsak lohzia a tihlan vanga lo chhuak ta a ni tih mipui mimir leh a bikin zirlaite hian hria se kan duh tak zet a ni,” an ti.