Kawng siam loh vangin harsatna tâwk
Mizoram University kawnga veng pariata YMA branch-te chuan thuchhuah siamin, Ch. Chhunga High School leh Ropaiabawk inkar kawngpui siam zawh a la ni loh avangin kawng hmangtu mipuite'n harsatna an tâwk niin an tarlang.
Thuchhuah siamtute hi Zonuam, Luangmual, Chawlhhmun, Tuivamit, Tanhril, Tanhril Vengthar, Central Jail Veng leh Sakawrtuichhun branch YMA-te intelkhawmna, MZU Road Joint YMA an ni a, nimin khan an kawngpui chungchang an sawiho.
An thuchhuah tarlan danin, MZU kawng, km. 10 vela thui hi kum 2012-13 chhunga siam zawh tura tih ni mah se, Luangmuala Ch. Chhunga H/S pêng aṭanga Chawlhmun Ropaiabawk inkar, km. 1.8 vela thui chu siam a la ni lo. Kawng hi siam tura laih zauh tawh a nih avangin a bawl chhe hle a, tunlai hian a khu nasa hle a ni.
MZU Road Joint YMA chuan, kawng siam zawh thuai theih nan sorkarah ngenna an siam a, PWD hotute pawh an hmu fo tawh tih an sawi a; nikum lamah pawh an lo ngen tawh a, mahse tun thlengin hna an la thawk lo niin an sawi bawk.