Sports leh Tourism department-te'n SMS ngai lo sum tam tak an hâi lut - MNF

MNF party chuan nimin khan thuchhuah siamin, MPCC-te'n Sports leh Tourism department-in state matching share (SMS) ah harsatna an tâwk ve lo nia an sawi chu thu dik lo niin an tarlang a, "Union budget aṭangin state share ngai lo chi tam tak an hâi lut a ni," an ti.

MNF chuan, "Hre chiang si loa mipui fuihpawrh tumna a ni. Kum 2019 aṭang tawh khan Sports department hian Mizoram budget aṭangin matching share a la hmang lo," an ti a; Tourism department pawhin kum hnih chhungin matching share atan cheng nuai 1.98 chiah an hman thu an tarlang.

MNF chuan, ZPM ṭhalaite'n sport incentive cash award sem tikhawtlaia Sports department an puh chungchangah, "Incentive cash award hi award ceremony ropui taka buatsaiha sem ṭhin a ni a, Covid-19 avanga mipui punkhawm a rem lo a ni," an ti a; sorkar hotute leh sport association aiawhte inráwn khawmin Covid-19 reh hunah award ceremony ropui taka buatsaihin sem an rêl niin an tarlang bawk.