Party hruaitute'n an MLA-te hoin Mizoram-Assam ramri an tlawh

Tun hnaia Mizoram leh Assam ramria buaina chhuahna hmunte chu political party ṭhenkhat hruaitute chuan an party aṭanga MLA ṭhenkhat hoin an tlawh a; ramri venga duty-te hnenah ṭanpuina thilpek an hlàn hlawm.

Congress Legislature Party (CLP) secretary Lalrindika Ralte hoin MPCC hruaitute chuan Inrinni aṭang khan Vairengte leh Saihapui-V an tlawh a; Vairengte dáia duty police-te hnenah Rs. 5,000 leh tui in tur ṭhahnem tak leh Vairengte Joint YMA hnenah Rs. 10,000 an hlàn. Nimin khan Saihapui-V khuaa ramri vengtu police leh tualchhung mite tlawhin, police-te hnenah leh Saihapui-V VC hnenah Rs. 5,000 ve ve an hlan bawk.

MPCC Boundary Committee chairman KS Thanga leh party hruaitu dangte pawhin October 18 khan October 17 zana Assam lam nena inbeihnaa hliamte an tlawh kual a; hliam kan nan Rs. 10,000 an pek bakah, Saihapui-V leh Vairengtea duty-te tan pawisa an pe a ni.

CLP secretary Lalrindika Ralte chuan, ramri humhalhna kawnga Vairengte khawtlang hnathawh chu ropui a tih thu leh huaisenthlak a tih thu a sawi.

MPCC thuchhuah chuan, ramri humhalhna kawnga Vairengte, Saihapui-V, Thinghlun leh ramri depa khaw mite chet dan chu an thlâwp tlat thu a tarlang a, "Ramri humhalh kawnga Mizoram mipui ṭanrualna te, Gorkhali unaute inpekna te, hmun danga Mizo awmte'n Mizoram an thlàwpnate hi lawmawm kan ti tak zet a ni," a ti.

Congress party ṭhalaite pawhin an president Dr Lalmalsawma Nghaka hoin nimin khan ramri an tlawh a, Vairengte thlanga duty IR sipaite hnenah Rs. 5,000 leh Vairengte Joint YMA hnenah Rs. 10,000 an hlan bakah, Kolasib-a enkawl mek Lalmalsawma kanna Rs. 25,000 an hlàn.

Dr Lalmalsawma chuan, Vairengte mipuiin Mizoram ramri humhalh nana Lailapur mipui thui tak an nawr let chu thil chhinchhiah tlak a nih thu a sawi a; Mizoram sorkar chu ramri depah police post nghet siam tur ngenin, "Thawkkhat laia Zo Rûn sakna thlang daih field bul thleng Vairengte mipuite'n Lailapur mipui an nawr thla tawh a, sorkar hi a rang lama Mizoram chin nia a chhàl chinah police out post nghet siam nghal turin kan ngen. Hei hi Vairengte leh Mizo mipui lungdamna tur a ni," a ti.

Zoram Peoples Movement (ZPM) party hruaitute chuan ZPM Legislature Party member pahnih - Dr Vanlalthlana leh Andrew H Thangliana te hoin ramri hmun hrang hrang an tlawh. Ramri venga awm IR sipaite hnenah silpauline, hand sanitiser, hmai tuamna leh pawisa an pe a; Inrinni zana buainaa hliam Lalmalsawma, Vairengte chu Kolasib District Hospital-ah tlawhin, kanna sum an hlan a ni.

ZPM chuan thuchhuah siamin, Mizoram humhalhna kawnga Vairengte mipui thil tih chu fakawm an tih thu leh an chhuan tak zet thu an tarlang a, "Vairengte khawtlang mipuite'n huaisen tak leh nunna chàn huam a, hliam tuar khawpin an hmachhawn a, ram leh hnam humhalhna kawnga Vairengte mipui chêtna avangin kan ram a him mai bakah, Mizo chu hnam huaisen, mahni ram chin hauh tina tak kan nihzia khawvel hriata a lang leh ta hi a lawmawm hle a ni," an ti.

ZPM party chuan, ramri chungchanga political party leh NGO-te'n October 17, 2019-a resolution an siam tawh bawhzuia JAC on ILR hmalakna chu an thlàwp thu an tarlang bawk.

MNF ṭhalaite pawhin an president Lalrinawma, Assembly deputy speaker hoin Vairengte leh Saihapui-V an tlawh a, sorkarin theihtawp chhuaha hma a lak dawn thu an sawi.

MNF MLA dang - govt. deputy chief whip Lalrintluanga Sailo, Dr ZR Thiamsanga, L Thangmawia, H Biakzauva, Prof. F Lalnunmawia, C Lalmuanpuia leh Dr Vanlalṭanpuia te pawhin Vairengte hi an tlawh. Lalrintluanga Sailo chuan, Mizoram sorkarin theihtawp a chhuah zel dawn thu leh tlàwm mai mai a tum loh thu a sawi.

Bialtu MLA Lalrinsanga Ralte chuan a bial chhunga ramri hnai khuate hi a ṭhutchilh a; Vairengte leh Saihapui-V a kàr tawn ṭhin a ni.