August-ah tui pump ṭhat theih beisei; A pangngaia sem hun tur a la hla deuh

PHE department hotute chuan, tun August thla chhungin dan pangngai anga tui pump chhuah theih an inbeisei a; mipuia tui semah erawh dan pangngaia kal theih hun tur a la rei deuh an ring.

PHE minister Prof. Lalnilawma'n nimina a pisaa thuthar thehdarhtute a kawmnaah PHE hotute chuan, Cyclone Remal vanga Aizawl khawpuia tui pump-a harsatna an tawh leh harsatna sukiang tura hma an lak dante an sawi a, "Theihtawp kan chhuah a, hma kan sawn ve zel," an ti.

PHE department hotute chuan, Cyclone Remal vanga khawl chhia chu Guwahati-ah siam zawh a ni tawh tih sawiin, "Engineer-te'n a hmunah an endik a, an duhthusam ang a nih loh avangin ṭhiat darh lehin a bul aṭangin an siamṭhattir leh a ni," an ti a; August 22, 2024-ah Aizawl phurh thlen theih beisei a nih thu an sawi.

August 2024 chhungin dan pangngaiin tui pump theih an inbeisei thu sawiin PHE hotute chuan, "Kan beisei dan a ni a, kan pump thei kher ang em tih erawh a hriat loh," an ti.

PHE hotute chuan, dan pangngaiin tui pump theih ni mah se, dan pangngai angin tui sem nghal theih a ni dawn lo tih sawiin, "Tui sem a khaihlak rei tawh avangin a pangngaia sem leh theih hun chhung a la rei dawn," an ti a, tui sem a khaihhlak hlekin a pangngaia tui sem leh hun chhung a rei ṭhin thu an sawi.

PHE dept. hotute sawi danin, dan pang­ngai anga tui pump theih ṭan a nih aṭanga thla khat velah dan pangngaiin tui sem leh theih a nih an ring a; chutihrualin, khaw­chinin a zir loh chuan khawl ṭha tawh mah se, dan pangngaiin tui pump theih a ni lo thei bawk.

Tui pump-naah chirh, hnáwl leh dûm a tam avangin harsatna an tawk nasa a, ruah a sûr tamin tui a nu ṭhin a, tui pump mumal theih a ni lo ṭhin.

May 2024 dinhmun angin Aizawlah tui connection 79,322 a awm a; Aizawl Water Supply Scheme Phase III-in ni khatah tui litre nuai 100 a pump ṭhin avangin consumer tam zawkte'n thla khatah tui vawi hnih an dawng thei a, vawi thum dawng hman pawh an awm.

Remal Cyclone-in PHE khawl a tihchhiat avangin tui pump chhuah a tlem a, thla khata tui vawi khat emaw, vawi hnih emaw dawng hman connection 79,004 chauh a awm. June thla chhungin tui dawng lo connection 358 a awm bawk.

Tui pump chhuah zat chu Remal vangin June 2024 khan chawhrualin ni tin litre nuai 159.1 velah a tla thla a, July-ah litre nuai 218.4 pump a ni. August thlaah hma sawn lehin, ni tin litre nuai 280 pump theih a ni mek a; Remal thawh hma chuan ni tin litre nuai 29 pump theih a ni ṭhin.