Aizawlah ruihhlo do kawngzawh huaihawt

Excise & Narcotics department chuan nimin zing khan Independence Day lawmna leh ruihhlo dona atan Aizawlah ruihhlo do kawngzawh, Walkathon - Walk Against Drugs an huaihawt a, END minister Lalnghinglova Hmar-in hmanpuiin a vailiam.

Kawngzawhah hian sikul hrang hrang aṭangin zirlai 250 chuang an tel a, Central YMA hruaitu te, END-a thawkte leh ruihhlo donaa mi ṭhahnemngaite nen mi 400 vel an tel. Thupui chu 'Together we can create a safer, healthier and drug-free community' (Kan ṭanho phawt chuan khawtlang him zawk, hrisel zawk leh ruihhlo laka fihlim kan din thei ang) tih a ni.

Vanapa Hall kawta bul ṭannaah Lalnghinglova Hmar chuan, India ram zalenna sualtute khan thil tam tak an chán a, mi tam takin nunna an hlan hnuah India ramin zalenna a nei tih a sawi a, "Mizoramah sorkar, khawtlang, tlawmngai pawl leh kohhranin ruihhlo kan do a, a rah kan hmu nghal mai lo a ni thei. Beidawng loa kan do zel chuan Mizoram hi ruihhlo lakah kan la zalen ngei ang tih beisei chungin ruihhlo hi i do zel ang u," a ti.

Ruihhlo do kawngzawh hi END commissioner Z Lalhmangaiha'n a kaihruai a; kawngzawh khârnaah END secretary Lalramsanga Sailo-in thu a sawi a, joint commissioner Peter Zohmingthanga kaihhruaiin ruihhlo laka fihlim tur leh ruihhlo donaa mawhphurhna hlen tura intiamna thu sawi rual a ni.