Fanu pawngsualtu kum 20 táng turin ti

Aizawl District Court-a special judge (POCSO Act) Helen Dawng­­­­liani, district & sessions judge ni bawk chuan Aizawl district khaw pakhata pa pakhat, a fanu kum 13 mi pawngsualtu chu thiam loh a chantir a, kum 20 chhung tang tur leh Rs 50,000 chawi turin a hrem.

Thu dawn danin, Aizawl district-a khaw pakhatah pa pakhat chuan kum 2020 khan vawi khat aia tam a fanu kum 13 mi chu a pawngsual a; a thil tih chu police hriattir niin, police-in an chhui zui a ni. Fanu pawngsualtu lakah hian Special Judge (POCSO Act) chuan August 13, 2024 khan thu­­tlukna a tichhuak.

Court thuremnaa a lan danin, a fanu kum 13 mi mipat hmeichhiatna hman khawlohpuitu chu IPC Section 376(3) tlawh­chhanin thiam loh chantir a ni a; kum 20 chhung hrehawm taka táng tur leh Rs 50,000 chawi tura tih a ni. Pawisa a chawi loh chuan thla thum dang tàn belh turin a ti bawk.

Pawi khawihtu chu POCSO Act Section 6 tlawhchhanin thiam loh chantir a ni bawk a, kum 20 chhung táng tur leh Rs 50,000 chawi tura hrem a ni. Pawisa chawi tur hi a chawi loh chuan thla 3 dang táng tura hrem a ni bawk. Dan pahnih tlawhchhana hremnate hi a ruala kal tur a ni.