President’s Police Medal dawng turin Mizoram Police mi pathum thlan an ni

Ministry of Home Affairs (MHA) chuan kumina Independence Day puala India rama police hna thawk ṭhate chawimawina sang, President’s Police Medal hrang hrang dawng tur a puang a, Mizoram Police officer pathum an tel.

MHA chuan President's Police Medal for Distinguish Service dawng turin Zoramsanga Ralte, MPS, tuna 3rd MAP deputy commandant a thlang. Amah hi police-ah kum 36 chhung a thawk tawh a; kum 2003-2024 chhung khan Kosovo UN Mission-ah kalin, UN medal a dawng tawh a ni.

President's Police Medal for Meritorious Service dawng turin deputy SP ni mek Kaste Romalsawma leh 1st IR-a awm mek inspector Vanlalhluna te thlan an ni.

Kaste Romalsawma hi kum 1995 khan sub-inspector-ah a lut a, kum 27 a thawk tawh a, assistant director (operation) hna a chelh mek. Kum 1997-a Mizoram Liquor Total Prohibition Act, 1997 hman a nih khan Mizoram police officer zinga zu man tam ber leh chargesheet thehlut tam ber a nih thu Police thuchhuah chuan a tarlang.

Vanlalhluna hi Police-ah kum 36 chuang a thawk tawh a, 1st IR battalion, Mualvum-ah quarter master a ni mek. Police a nih tawh chhungin hlawh­tlinna pawimawh tak tak a nei tawh a ni.

Police thuchhuah chuan, Mizoram Police-a mi pathum President's Medal dawng tura thlan an ni chu an lawmpui thu a tarlang a, "Hna thawk ṭha leh mi entawn tlak kan nei hi kan chhuangin, an chawimawina dawn kan ngaihlu tak zet," a ti.