Lei chhung tui la chhuak turin phalna lak a ngai tawh dawn

Public Health Engineering (PHE) minister Prof. Lalnilawma chuan nimin khan a pisaah thuthar thehdarhtute a kâwm a; lei chhunga tui la chhuak tur tan phalna lak a ngaih tawh dawn thu a puang.

PHE Minister chuan, Mizoram sorkar thuchhuak angin Mizoram Ground Water (Control & Regulation) Act, 2023 leh Rules 2024 hman ṭan a nih thu a sawi a, "He dan hnuaiah hian Mizoram State Ground Water Authority (MGSA) din a ni a, he Authority hian state puma lei chhung tui hausakna humhalh leh hman dan mumal takin a kalpui dawn," a ti.

Lei chhung tui la chhuaka hman tum (mahni hman tur, sumdawnna, lo neihna leh industry atan) tan MGSA-ah form siam sa hmangin dilna thehluh tur a nih thu sawiin Prof. Lalnilawma chuan, "Dan hian tui humhalh a ngai pawimawh a, ruahtui khawl leh lo neihna atan tui hman dan ṭha zawk a ngai pawimawh," a ti a; lei chhunga tui awmte humhalh a nih theih nan dan zâwm turin mipui a ngen.

PHE Minister sawi danin, lei chhunga tui la chhuak tura tih ngaite chiang zawka hre duh tan PHE website www.phed.mizoram.gov.in ah en theih a ni a, MGSA pisa (PHE E-in-C office)-ah zawh theih a ni bawk.

Vanglaini palai zawhna chhangin PHE department hotute chuan, lei chhunga tui la chhuak tawhte pawhin dilna an thehluh vek a ngaih thu an sawi a, "Dan zâwm lote chu hriat chhuah hun a awm ngei ang. Dan zâwm lote chu vawi khat manah Rs 5,000 aṭanga Rs 1,00,000 chawitir leh thla ruk chhung táng tura hrem theih an ni," an ti a; man nawn an nih chuan hremna a nat belh zel thu an sawi.