MNF-in Lengpui Airport IAF hnena hlan an duh lo

MNF Publicity Board hruaitute chuan nimin khan Aizawl Press Club-ah thuthar thehdarhtute an kâwm a; Indian Air Force (IAF) hnena Lengpui Airport hlan an duh loh thu an puang.

MNF Publicity Board vice chairman J Malsawmzuala Van­chhawng chuan, Mizoram sorkarin IAF hnenah Lengpui Airport hlan a duh dawn nia a lan thu a sawi a, "MNF chuan a duh lo tak zet. Mizoram tana ro tling ZPM sorkarin thehthang a tum dan hi mipui pawisawina nasa tak a nih dawn avangin kan pawmpui thei lo. A tàwp thlenga dodal kan tum," a ti.

Lengpui Airport chu Mizoram mipuiin an mamawh dan leh IAF hnena hlan a niha an hman dan tur a inpersan nia sawiin J Malsawmzuala chuan, "IAF chuan venhimna lam an ngaih pawimawh ber laiin, Mizoram mipui tan thlawhna hmanga zin veivahna atana kan hman ṭangkai ber a ni," a ti a; IAF kuta hlan a nih rualin Mizoram mipuiin harsatna an tâwk nghal dawna an ngaih thu a sawi.

J Malsawmzuala chuan, IAF kuta hlan a nih chuan civil airport anga hman ṭhin IAF thuhnuaia awm dangte ang bawkin ṭhan zel chu sawi loh, thlawhna service awm mekte pawh a tlem zel dawn nia sawiin, "A tuartu chu Mizoram mipui kan ni dawn. Kum 1944 aṭanga hman tawh Silchar Airport ṭhan loh dan te, Jorhat leh Tezpur airport dinhmunte enin hei hi a chiang," a ti.

MNF Publicity Board chuan, Lengpui Airport chu a ṭhan chak avang leh sum a thawh chhuah pawh a pun zel avangin AAI nen pawh indawrna a lo awm tawh ṭhin tih sawiin, "Ram tana ro hlu tak a nih avangin mi dang kuta hlan chhawn dan turah sorkar kal tawhte'n uluk takin ngaihtuahna an séng ṭhin," a ti a; Mizoramin a hlâwkpui tur leh mipui pawhin an pawm tlan theih tur inremna a la awm thei lo niin an sawi.