Khaw pathuma mipui lungawih lohna Health department-in an sawifiah

Health & Famliy Welfare department chuan Chawngte, North Vanlaiphai leh Pangbalkawn khuate thil phût chungchangah August 13, Thawhlehni thuchhuah an siam a; Health department-in thawktu leh hmanruaah indaih lohna nasa tak a tawh mek thu an tarlang.

Chawngte Joint NGO-in Chawngte damdawi-in (CHC)-a thawktu leh hmanraw indaih lohna Health Minister hnena an thlenah hmalakna a awm lo nia an tarlan chungchangah HFW chuan, sorkarin duhsak takin Chawngte leh a chhehvel mipui tan hmalak a tum thu a tarlang a, "Sorkar aṭangin ambulance lei phalna dawn a ni tawh a, sorkar kalphung angin lei tura buaipui mek a ni a, NHM hnuaiah ultrasound khawl lei tura buaipui mek a ni," an ti.

Health supervisor-a kaisang tur eng emaw zat an awm thu tarlangin HFW chuan, "An kaisan veleh Chawngte-ah health supervisor dah tum a ni. Chawngte C-ah hian health & wellness officer pakhat leh health worker pakhat an awm mek chungin, mipui an cover tam avangin health worker pakhat dah belh tum a ni," an ti a; Chawngte CHC chu Mizoram CHC zinga sub divisional medical officer (SDMO) nei awm chhun a nih thu an tarlang.

HFW department tarlan danin, Chawngte CHC-ah doctor pali - SDMO (MBBS), medical officer (MBBS), dental surgeon leh medical officer (Ayush) pakhat ṭheuh an awm a; Mizorama CHC zingah doctor nei tam ber zinga mi a ni. X-ray khawl pahnih an kawl mekte chu report an dawn dan chuan a la hman tlak a; a dinhmun chian zawka hriat a nih hnuah a ṭul anga ngaihtuah a ni ang.

North Vanlaiphai damdawi-ina Ayush doctor pakhat, thlaktu awm loa June 28, 2024-a sawn chhuah a nih chungchangah HFW department chuan, N Vanlaiphai PHC-ah hian National Ayush Mission (NAM) hnuaiah Ayush doctor post a awm loh thu an tarlang a, "Ayush doctor thawk lai mek hi NAM hnuaia post awmna hmunah sawn a ni," an ti.

N Vanlaiphai All NGO Coordination Committee chuan an khaw damdawi-ina thawk lai Ayush doctor chu thlaktu awm loha sawn chhuah a nih avang leh thlaktu awm lo headmaster sawn chhuah a nih avangin lungawi lohna lantir nan Independence Day boycott an tum thu August 12, 2024 khan an lo puang tawh a ni.

Health department chuan, Pangbalkawn Health & Wellness Centre-ah health & wellness officer pakhat leh health worker pahnih an awm ṭhin thu tarlangin, Darlak khuaah health worker an awm loh avangin Pangbalkawn Health & Wellness Centre aṭangin health worker pakhat chu Darlakah sawn a nih thu an tarlang bawk.