PHE leh CYMA-in Mizoram pumah faina hnatlangpui huaihawt an rêl

Public Health Engi-neering (PHE) minister Prof. Lalnilawma chuan nimin khan a pisaah Central YMA hruaitute tuihna humhalh leh faina kawnga thawhhona chungchang a sawipui a; Mizoram pumah faina hnatlangpui buatsaih ni se an ti.

Prof. Lalnilawma chuan, tuihna humhalh leh faina kawngah CYMA leh PHE department-te'n thawh dunna ṭha tak an lo neih tawh chu chhawm nun zel a ṭul thu a sawi a, "Nasa lehzuala ṭan lak a, inṭawiawm tawn zel a pawimawh," a ti a; thuràwn pe ṭhin tur leh harsatnate a hnena thlen ṭhin turin a chah.

CYMA president Lalhmachhuana chuan, PHE department chu thawhpui nuam an tih thu sawiin, "YMA inkhawmpui lian vawi 74-na, Biatea neihah khan tuihna humhalhah tun aia nasa zawka hmalak rel a ni," a ti a; tuihna humhalh leh faina lamah YMA-in ṭha takin sorkar a thawhpui zel dawn thu a sawi.

Inkawmnaah hian tuihna humhalh leh faina lama hmalak dante thlirho a ni a; lui kama awm tuihna siamtu thing leh maute humhalh tura ṭan lak lehzual a ṭul thu te, hmalak dan tur leh luidung tibawlhhlawhtu hnawmhnawk tihfaia ṭan lak a ṭul thu sawi niin, Mizoram pumah faina hna-tlangpui buatsaih an rêl a ni.

PHE secretary F Liantluanga, engineer-in-chief Lalrothanga leh chief engineer H Duhkima te, CYMA office bearer te, CYMA hnuaia Science & Environment sub-commit-tee member-te an tel.

PHE department leh CYMA hian kum 2012 aṭangin 'Kan rama tuihna humhalh leh a awm sa tihpun' tih thupuia neiin thawh dunna thuthlung an ziak a, chumi hnuah thuthlung chhunzawmna ṭum hnih ziah a ni tawh. Thawh dunna kalpui mek chu October 28, 2021-ah ziah a ni a, kum li (2021-2025) chhung atan a ni.