Partition Horrors Remembrance Day

BJP, Mizoram chuan nimin khan Aizawla an pisaah Partition Horrors Remembrance Day leh Silent March hun an hmang.

Partition Horrors Remembrance Day leh Silent March pual inkhawm hi BJP secretary Dr Zonuntluanga'n kaihruaiin, president Vanlalhmuaka'n thu a sawi a; PC Lawmkunga, IAS (Rtd)-in 'Partition' chungchang a sawi.

Vanlalhmuaka chuan, India ram pumah Independence Day uar tak leh hlim tak khua leh tuite'n an lawm ṭhin chu lawmawm a tih thu a sawi a, "India ram inpumkhatna a nghet zual zel. India ramah hian inṭhenhranna thleng tawh lo se tih hi Pu Modi-a kaihhruai sorkar duh dan a ni," a ti.

PC Lawmkunga chuan, India ram ṭhen hran a nih dawnah hun khirh leh harsa India-in a tâwk tih a sawi a, "He thil thleng lungchhiatthlak tak hi kan ramah a thlen tawh loh nan leh nghilh a nih tawh loh nan August 14 hi 'Partition Horrors Remembrance Day' tia hman a ni," a ti a, Narendra Modi kaihhruaina hnuaiah kum 2021-ah hman ṭan a nih thu a sawi.