ST tan seat dah belh turin ngen

Regional Institute of Paramedical and Nursing Sciences (RIPANS)-in thawktu lakna a kalpui chung­changah nimin khan Aizawl bawrhsap Lalhriatpuia kaihhruaiin Aizawl DC conference hall-ah RIPANS hotute leh MSU hruaitu an inbia a; MSU chuan RIPANS hna lak turah ST tan seat dah belh turin an ngen.

MSU thuchhuah tarlan danin, RIPANS-in June 25, 2024-a employment notice an chhuahah hna (post) 14 awmah scheduled tribe tan pakhat hauh a ni a, ST tan dah belh turin an ngen. RIPANS hotute'n central lam hotute an dâwr a, DOPT-ah file a lut tawh a, nghal turin MSU an ngen.

RIPANS hna laknaah reng reng tualchhung mite duhsak bik an duh thu leh, thawktu mi 14 lak tura hauhsak bik awm lo (unreserved) pali-ah Mizoram mi ngei lak ni se an duh thu an tarlang.

MSU chuan, RIPANS Hospital din tura hna lak dan turah, NORCET hmanga lak tura tih a ni chu an duh loh thu an tarlang a; NORCET hmanga lak a nih chuan hnam dang tam tak an lo lut dawn a, ram leilung fate chanvo leh hma­sawnna tur rahbehna a ni dawn nia sawiin, NORCET hmanga hna lak chu a tàwp thlenga an dodal tur thu an sawi.

RIPANS admission atana RIPANS Common Entrance Test tihtawp tawh chu hmang leh turin MSU chuan RIPANS hotute an ngen bawk.