KHAWTHLIR

Thisen pe

Higher and Technical Institute of Mizoram (HATIM) NSS leh Red Ribbon Club chuan nimin khan an campus-ah thisen pek an huaihawt a, Civil Hospital, Lunglei tan thisen unit 110 an pe a, petute mipa 77 leh hmeichhia 33 an ni.

Chawlh puang

General Administration Department chuan August 22, 2023-a AMC Ward-VI by-election neih turah Ward-VI huam chhung - Chanmari West, Hunthar Veng leh Edenthar Venga vote neite tan vote thlak ni, August 22 chu chawlhah a puang. Chawlh puan hi voter-te'n vote an thlak ṭheuh theihna tura tih a ni a; sorkar hnathawk (central/state public undertaking-te tiamin), zirna-in leh bank chawlh puan a ni.

Drone thlawh khap

Aizawl district magistrate Lalhriatpuia chuan thupek chhuahin, vawiina Lammuala Independence Day lawm tur kaihhnawihah Lammual chung, Raj Bhavan huam chhung leh Chief Minister Bungalow chungahte remote control hmang drone/aerial camera leh a kaihhnawih lam chi reng reng thlawhtir a khap. Thupek zâwm lote chu an drone/aerial camera-te man/kahthlak a nih dawn bakah, BNS Section 233 hmanga hrem theih an ni.

AR-in ram dang meizial an man

Assam Rifles sipaite chuan August 13, Thawhlehni khan Champhai Ruantlang huam chhungah ram dang meizial báwmpui 159 an man a, cheng nuai 206 hu a tling. August 13 vek khan Hruaikawn huam chhungah foreign cigarette bawmpui 150 an man bawk a, cheng nuai 195 hû a ni. Ram dang meizial an mante hi Champhaia Customs hnenah an hlan.

MPSC member

Mizoram Governor chuan Mizoram Public Service Commission member atan nimin khan K Lalhmingliana, MCS a ruat. K Lalhmingliana hi AMC commissioner hna chelh lai a ni a, a hmain Mizoram sorkarah additional secretary a ni. Mizoram sorkar aṭangin voluntary pension-in a chhuak ang a, MPSC member-ah a lut dawn nia thu dawn a ni. MPSC-ah hian Chairman leh member pahnih an awm mek.