KHAWTHLIR

Central YMA Executive Committee nimina ṭhukhawm chuan, kumin Krismas pualin home, centre leh damdawi-in hrang hrang 23-ah Rs. 1,48,000 sem ni se, an ti. CYMA hian Aizawla an pisa chu nimin khan kumin atan an khâr a, January 6, 2021-ah hawn ṭan leh a ni ang. Hetihlai hian CYMA pisa leh Sub. Hqrs. pisate chu nimin aṭang khan khar a ni a, January 6, 2021 ah hawn leh a ni ang.

Mizoram Youth Commission (MYC) bultuma India rama IAS coaching academy ṭhaa coaching kal tur thlannaah nimin tlai khan personal interview zawh a ni a, nimin khan chhuak nghalin, scheduled tribe category-ah mi 19 leh general category-ah mi pakhat an tling. Mi 20-te chu Mizoram sorkarin coaching an kalna senso zawng zawng a tumsak dawn a ni.

Land Resources, Soil & Water Conservation dept. chuan nimin khan Lawngtlaia an pisa tualah Sihtlangpui khua leh Chawntlangpui khuaa ṭhelret chingtute hman turin ṭhelret sawngbawlna khawl (rubber rolling machine) leh a kaihhnawih hmanraw dang an sem a, Lawngtlai East bialtu MLA H Biakzauva'n a hmanpui.

Mizo Students' Union (MSU) General Head­quarters chuan nimin khan Synod Conference Centre-ah kum 2020-2022 chhunga office bearer turte hlanna inkhawm an hmang. MSU hian OB thar thlanna hi December 10, 2020-ah an nei a; president atan J Lalmuanzuala, vice president atan RK Hnuna, general secretary atan Samuel Zoramthanpuia te an thlang a ni.

Local Administration department chuan nimin khan Lunglei DC conference hall-ah Lunglei district-a Promotion of Trans­parency in Local Administration, Phase-I, 2020 thawk ṭhate hnenah lawmman an hlân. Lawmman dawngtute chu Salem Veng, Venglai, Sazaikawn, Hauruang leh Serkawnte an ni.