PMVDY chungchang sawiho

Aizawl District Level Co-ordination & Monitoring Committee chu nimin khan an chairman, DC R Lalramnghaka hoin DC conference hall-ah an ṭhukhawm a, Pradhan Mantri Van Dhan Yojana (PMVDY) chungchang an sawiho.

Aizawl DC Van Dhan Mission bul tum bulpui ber chu tribal-te'n an chhehvel a ramngaw hausakna awmze nei leh tribal-ten an chhehvel ramhnuaia thil thar chhuah te an mahni ngeiin an sawngbawl a, a hralhna thleng a an kutken theihna tur scheme a nih thu a sawi a, "India ram chhunga tribal-te thil thar chhuah hi ramhnuai aṭanga lak Minor Forest Produce (MFP) kan tih mai te hi tribal-te inngahna berte zing a mi a ni. MFP hrang hrang aṭang hian eitur leh damdawi lam chi te siam nan ṭangkai taka hman a ni," a ti.

Meeting hian central sorkar-in a duan angin training leh hnathawhna tur hmanrua tenau SHG pakhat zelah Rs. 1,00,000 (nuai khat) hman a rem ti a ni. SHG pakhat zelah training atan 33% leh hmanrua lei nan 67% hman tura ruahman a ni. SHG pakhat ah member 20 zel awm turin SHG 15 ten Kendra (Centre) pakhat siam tur a tih a ni a, Kendra pakhat aṭangin MFP lakkhawm dan tur te, sawngbawl dan tur leh hralh chhuah zel dan turte Kendra awmna hmuna zirin zirchian leh ni se an ti.