State pumah Independence Day lawm a ni

India ramin British awpna laka zalenna a hmuh champha, Independence Day vawi 78-na chu nimin khan Mizorama district khawpui tin bakah, SDO (Civil) leh BDO ṭhuthmun khuaahte leh hmun hrang hrangah lawm a ni a; minister leh MLA-te'n hmanpuiin, lawmman leh chawimawina hrang hrang sem a ni.

LUNGLEI

Independence Day hi Lungleiah chuan C Ṭhuamluaia Mualah lawm a ni a, minister Vanlalhlana khuallian niin, Legislative Assembly deputy speaker Lalfamkima khualzahawm a ni. Vanlalhlana'n zing dar 9-ah hnam puanzar a pawt parh a, hnam puanzar chibai bûktu parade contingent 31-te chibai bûk a chháng lêtin, lawmman leh chawimawina hrang hrang a sem.

Lungleiah hian parade contigent 31 an awm a, armed contingent pali, unarmed contingent pasarih, school contingent 17 leh pipe band pathum an ni. Unarmed contingent-ah Sacred Heart School Scouts & Guides pakhatna an ni a, school contingent-ah 2nd MAP English Medium School pakhatna an ni.

SIAHA

Siahaah chuan Meisatla SDFA Ground-ah I-Day lawm a ni a, minister K Sapdanga'n hnam puanzar pawt pharhin parade contingent-te'n hnam puanzar chibai an bûk a chháng lêt a, thuchah a sawi.

Siahaa I-Day lawmnaah hian parade contingent 22 an awm a, armed contingent pahnih, unarmed contingent pahnih, school contingent 17 leh pipe band pakhat an ni a; school contingent zingah Hill Gate School pakhatna an ni. Minister hian lawmman leh chawimawina hrang hrang a sem.

K Sapdanga hian I-Day programme zawhah Mara Autonomous District Council-a chief executive member M Laikaw buatsaih VIPs At Home a hmanpui a; chumi hnuah cheng nuai 420 senga siam Thosai khaw khelmuala phûllem phah a hawng bawk.

CHAMPHAI

Champhaiah chuan Chhangphut Field-ah I-Day lawm a ni a, minister PC Vanlalruata'n hnam puanzar pawt pharhin, parade contingent 18-te'n hnam puanzar chibai an bûk a chhang let.

Champhaia I-Day lawmnaah hian unarmed contingent-ah GM Higher Secondary School NSS pakhatna an ni a, school contingent-ah Bethel Mission School pakhatna an ni.

KOLASIB

Kolasib-ah chuan Kolasib Sports Stadium-ah lawm a ni a; minister of state B Lalchhanzova'n hnam puanzar pawt pharhin, parade contingent-te chibai a chhang let a, lawmmante a sem.

Kolasib-a I-Day lawmnaah hian unarmed contingent-ah Diakkawn High School NCC Air Wing pakhatna an ni a, school contingent-ah Thingdawl JNV pakhatna an ni.

SERCHHIP

I-Day hi Serchhipah chuan Sports Complex-ah minister C Lalsawivunga hoin hman a ni a, zing dar 10-ah hnam puanzar a pawt pharh.

Serchhipah hian parade contingent 15 an awm a, unarmed contingent pali, school contingent 10 leh band party pakhat an ni. Khuallian hian parade contingent-te zahna chibai bûk a chháng lêt a, lawmman leh chawimawina hrang hrang a sem. Unarmed contingent zingah Little Flower Convent School Scouts & Guides pakhatna an ni a, school contingent-ah Goodwill English Academy pakhatna an ni.

YMA Sub-Headquarters, Serchhip Cultural Troupe-in hnam lâm chi hrang hrang - Khuallam, Sarlamkai, Khuailâm, Chai leh Chheihlâm an entir bawk.

LAWNGTLAI

Lawngtlaiah chuan Central Young Lai Association (CYLA) Khelmualah I-Day lawm a ni a, minister Lalrinpuii'n hnam puanzar a pawt pharh.

Lawngtlaiah hian parade contingent 22 an awm a; armed contingent pakhat, unarmed contingent pasarih leh school contingent 14 an ni. Unarmed contingent-a pakhatna chu Don Bosco School NCC an ni a, school contingent-a pakhatna chu Ngurnunsangi High School Girls an ni. Khuallianin lawmman leh chawimawina hrang hrang a sem.

MAMIT

Mamitah chuan GSA Playground-ah I-Day lawm a ni a; minister Lalthansanga'n hnam puanzar pawt pharhin parade contingent 14-te'n hnam puanzar chibai an bûk a chhang let.

Parade-ah hian parade contingent 14 awmin, armed contingent pakhat, un-armed contingent pahnih leh school contingent 11 an ni a; school contingent-ah Higher Secondary NSS pakhatna an ni.

SAITUAL

Saitualah chuan Keifang Centenary Sports Complex-ah lawm niin, bialtu MLA Prof. Lalnilawma, minister of state-in hnam puanzar a pawt pharh a, parade contingent 14-te'n hnam puanzar chibai an bûk a chháng let.

Minister hian parade contingent lawmman leh mimal chawimawina hrang hrang a sem a; school contingent-a pakhatna chu Keifang High School an ni.

KHAWZAWL

Khawzawlah chuan Mualvawm Field-ah I-Day lawm niin, minister of state Lalnghinglova Hmar-in hnam puanzar a pawt pharh. Parade-ah hian school contingent-ah Jawahar Navodaya Vidyalaya, Mamit pakhatna an ni.

Minister hian Mualvawm Field futsal ground a hawng nghal a, Khawzawl District Football Association hnenah futsal ball pahnih a pe. I-Day Football Tournament Under-12 leh Under-14 lawmman a sem bawk.

HNAHTHIAL

I-Day hi Hnahthialah chuan HDFA Turf Ground-ah lawm a ni a, minister Dr Vanlalthlana khuallian niin, bialtu MLA Jeje Lalpekhlua khualzahawm a ni. Khuallianin hnam puanzar a pawh pharh a, parade contingent-te'n hnam puanzar chibai an bûk a chháng let.

Hnahthialah hian parade contingent 11 awmin, armed contingent pakhat leh school contingent 10 an ni a; school contingent-ah Southern High School pakhatna an ni.

HMUN DANG

Gauhati High Court Aizawl Bench-ah pawh I-Day vawi 78-na lawm a ni a, judge Justice Nelson Sailo-in India hnam puanzar a pawt parh a, 225 Battalion CRPF-in hnam puanzar chibai an bûk.

High Court-a I-Day lawmnaah hian Gauhati High Court judge dang Justice Marli Vankung leh hotu dang te, District and Sessions judge Helen Dawngliani leh Aizawl District Court-a judge te, Fast Tract Special Court, Mizoram State Legal Services Authority, sorkar advocate-te leh Mizoram Bar Association hruaitute an tel.

Border Security Force (BSF) 38th Battalion pawhin Silsuri-a Border Outpost-ah I-Day an lawm a, an commandant Rakesh Panwar-a'n hnam puanzar a pawt pharh. Silsuri VC President leh khawtlang hruaitute an tel a ni.

Chief Minister's Office leh Aizawl Theological College-ahte pawh I-Day hman a ni a, hnam puanzar pawh pharh niin, chibai bûk a ni bawk.